FIFA U17 World Cup A hun a thleng ta

FIFA U17 World Cup chu vawiinah khelh ṭan a ni dawn ta. India chuan zanin dar 8:00-ah United States nen an match hmasa ber an khel dawn a, an inhmachhawnna tur hmun hi Jawaharlal Nehru Stadium, New Delhi a ni.

India leh USA inkhel hi Sony Ten 2 leh Sony Ten 3-ah live-in a en theih ang. India squad-ah hian Mizo pakhat a awm a, a hming chu Lalengmawia a ni - Vaivakawn rawlthar hi zaninah a inlan a nih chuan Mizo zinga World Cup khel hmasa ber a ni ang.

Vawiin tlai dar 5:00-ah match hmasa ber khelh a ni dawn - New Zealand-in Turkey an hma­chhawn ang a, Group A-a India-te nena awmho Colombia leh Ghana an inkhel dawn bawk a ni.

India inbuatsaihna
World Cup thlengtu nih manah India U17-in World Cup an khel dawn a, AIFF pawhin tih mai mai an tum lo. Kum 2015 aṭanga chhutin India U17-te ram pawna an zin kualna tura an insenso ringawt hi vaibelchhe 10 a ni.

Nicolai Adam enkawlna hnuaiah khan India hi Germany-ah an zin a, match 14-ah vawi riat an chak. India hi 2015 U-16 SAFF Championship khel turin an zin chhuak zui a, final-ah Bangladesh an hneh lo.

Kum 2016-ah Spain, Dubai, South Africa, Brazil leh Germany-ah India an zin chhunzawm a, hemi karah hian Goa-ah AFC U-16 Championships, AIFF Youth Cup leh U-17 BRICS tourney an khel bawk. Russia-ah India an zin a, an match hmasa berah Belarus U18 inhnehtawkpui mah se a hnu match liah an tlawm vek a, Russia U18 chuan 8-0 in an sawp hial - Nicolai Adam ban zui a ni.

The Matos Era
Sawiselna kara Nicolai Adam ban a nih hnuah Benfica Academy boss hlui Luis Norton de Matos chu India U17 enkawl turin lakluh a ni a, a match hmasa berah mualpho takin Minerva Punjab Academy chu 1-0 in an ngam lo.

Portugal-ah kar thum chhung hun hmangin India U17 an zin chhuak zui a, Benfica U17 an inhnehtawkpui tih loh chu result duhawm an nei lo.

Lazio Cup-ah India an inlan zui a, match thumah tlawm hmel an hmu lo - Lega Pro leh Lega Pro 2 aṭanga Italy U17 fuankhawm an hneh chu an chet ṭhat bera chhal ngam a ni. Match kaw chhung tlawm hmel an hmuh loh hnua an match hnuhnung berah Spanish second division club Alcorcon U17 an hneh lo a, India-ah an rawn kir.

Kar hnih an chawlh hnuah Mexico-ah India an zin chhuak a, Chile an inhnehtawkpui hnuah Colombia leh Mexico an ngam lo. World Cup ṭan hma kar riat chhung chu India U17 an zin chhuak tawh lo a, an inbuatsaihna hnuhnnung berah Mauritius U17 chu 3-0 in an sawp.

Tu nge Matos?
Kum 63 mi coach hi Feb­ruary 2017 khan Nicolai Adam thlak tura lakluh a ni a, Benfica B team coach hlui niin rawlthar chher kawngah a hming a chher hle - khawvel huap pawha hriat hlawh Renato Sanches, Goncalo Guedes leh Victor Lindelof-te hi Luis Matos chherchhuah an ni.

Matos hi player a nih lai­in Benfica academy aṭanga inzirchhuak a ni a, a career pumpui Portuguese top flight-ah hmang zoin ram tan match nga a khel ve bawk. Coaching a luhchilh hnuah top flight club pakhat Vitoria de Setubal chiah a la enkawl a, Sporting Clube de Portugal-ah Director of Football a lo ni tawh bawk.

Guinea-Bissau national team boss hlui hi Portuguese manager tam zawk ang thoin winger tlan chak ngaina mi a ni a, tlarhmaah striker pasang hmangin ball kang vawrh luh chu a khelhtir dan tlangpui a ni.

India innghahna
Tlarhmaah Aniket Jadhav chu India tan innghahna ni tura beisei a ni a, World Cup-a player langsar ni thei tur hiala rin hlawh a ni - enge a nih chiah kan hre thuai dawn. Sikkimese playmaker Komal Thatal ṭhatna hmuh hmaih a thiang lo a, Indian player zinga Uruguay leh Brazil laka goal khung thei awmchhun a ni.

India captain Amarjit Singh Kiyam hi midfielder niin Manipur lam chhuak a ni a, pressure sang tak hnuaiah a talbuai ve ngai lo. Chandigarh Football Academy aṭanga inzirchhuak midfielder hi hruaitu ṭha tak a ni bawk.

Full back Sanjeev Stalin hi tlarhnung lama India innghahna tur a ni dawn a, dead-ball specialist a nihna chu a hmingṭhatpui hle. Tlarhnunga ding tur tho Anwar Ali chet ṭhat leh ṭhat lohah India hi an innghat thui viau bawk ang.

USA dinhmun
CONCACAF U-17 Cham­pion­ship-a pahnihna dinhmun luahtu US hi team chhia an ni thei lo - tlarhmaah US U17 tan match 25 a khelha goal 24 khung thei Ayo Akinola, U17 tan vawi 32 a inlana goal 20 khung thei Andrew Carleton leh January 2018-a Werder Bremen senior team zawm tur Josh Sargent te an neih avangin India tlarhnung tan hna a tam dawn tih a chiang.

Tlarhnung lamah Ajax defender Sergino Dest, New York Red Bulls defender Chris Gloster, Sporting Kansas City player Jaylin Lindsey leh New York City rawlthar James Sands te an awm a, Aniket Jadhav leh a ṭhiante tan hna a tam sawt dawn tihna a ni.

US hian midfield laia awm turin DC United rawlthar ṭhang­duang Chris Durkin leh Atlanta United tana khel Chris Goslin te ho an kawl bawk a, team ṭha an ni tihah phat tur a awm lo.

Matos Thukhawchang
India U17 coach Luis Norton de Matos chuan, "Coach tinin duh dan bik ṭheuh kan nei a, ka duhah ka chiang. Ka vanneihna em em chu ka system mila khel thei player ka nei a, duhthlan tur ka nei nual a ni," a ti.
Portuguese coach chuan a naute dinhmun sawi nghalin, "Ka naute hian ka duhdan takin an khel ṭhin a, an fingin system an man rang hle. Football-ah hian a pawimawh hmasa ber chu fin a ni a, player thluak ṭha kan mamawh. Ka naute hian ram leh anmahni tan an khel a ni tih an hriat avangin an phur em em a, khelmual pawn leh chhung thlengin thu an awih em em," tiin a sawi.

Benfica B team boss hlui chuan, "Quarter final tal thleng thei ila ka duh. Mahse, chiang taka kan hriat tur chu tun World Cup-ah hian team chak lo ber pawl kan ni a, kan tum hmasak ber tur chuan kan khingpuite el phak nih hi a ni," a ti a, huai takin a ṭawng duh lo.

Inkhel en theihna
New Zealand 05:00 PM Turkey (Sony ESPN, Sony ESPN HD)
Ghana 05:00 PM Colombia (Sony Ten 2, Sony Ten 3)
India 08:00 PM USA (Sony Ten 2, Sony Ten 3)
Paraguay 08:00 PM Mali (Sony ESPN, Sony ESPN HD)

India Squad
GOALKEEPERS: Dheeraj Singh, Prabhsukhan Gill, Sunny Dhaliwal;
DEFENDERS: Boris Singh, Jitendra Singh, Anwar Ali, Sanjeev Stalin, Hendry Antonay, Namit Deshpande;
MIDFIELDERS: Suresh Singh, Ninthoinganba Meetei, Amarjit Singh Kiyam, Abhijit Sarkar, Komal Thatal, Lalengmawia, Jeakson Singh, Nongdamba Naorem, Rahul Kannoly Praveen, Md. Shahjahan;
FORWARDS: Rahim Ali, Aniket Jadhav.