Premier League Club Bihchianna Deeney–Brick remtu aṭanga Watford captain

Watford FC hi kum 1881 khan din a ni a, a dintirh hian Watford Rovers tih a ni a. Kum 1983 khan West Hertfordshire tihin club hming hi an thlak a, 1898-ah Watford hming hi a pu ṭan.

Football League-a an awm hmain 1896-1920 chhung khan Southern league-ah an awm. Kum 1920 aṭangin Football League hnuaiah an awm ṭan a, third division-ah an inziak lut. Hornets hi 1968-ah Second Division-ah an inpetkai ve chauh a, kum 1982 khan a vawi khat nan English football inelna sang berah an khel a, 1988 khan an relegate.

Kum 1999 khan a vawi khat nan Premier League an khel a, season khat bak daih loin Championship-ah an tla hniam a, First Division-ah te an tla thla hman hial. Kum 2006-ah Premier League rawn khel lehin thawnthu thar an ziak lo a, season khat bak an khel lo. Watford hi kum 2015 khan an rawn kir leh a, an tla leh tawh rih lo.

Tun season hi Premier League-a season nga an khelhna chauh a ni a, club tana khel hnem ber Troy Deeney pawhin Premier League match 154 chauh a la khel. Chutihrualin English striker Deeney hian chanchin ngaihnawm tak a nei a, football career a zawm hmain a zinkawng a bum boh hle.

Watford captain Troy Deeney hi June 29, 1988 khan Birmingham, England-ah a piang a, eizawnna atana football career a thlan hma hian hun harsa a paltlang. Deeney pa hi Paul Anthony Burke a ni a, a nu hi Emma Deeney niin a nu hming a chhawm.

Unau pathum an ni a, kum 10 mi a nihin a pa hian a nu nen a sawisak avangin khawtlang tana thawktuten an tlawh phah hial. Deeney-a kum 11 a nihin a nu leh pa te inṭhen a, Emma Deeney hian court-ah hnehna changin a fate hi a kawl a, chutihrualin a pa nen hian inkar a chhe zui hran lo.

Kum 14 a nihin Deeney hi football lamah a insawrbing lo a, zirna zawh phawt duh mah se a chem kalna a ni lo. Kum 14 a nih hian school aṭangin an hnawt chhuak a, kum 15 a nihin school-ah let leh mah se kum 16 a nihin zirna lamah a beidawng.

Deeney hian brick rem a zir ta thung a, kar khatah £120 a hlawh. India pawisa chuan kar khatah hian Rs 12,000 vel hlawh ang a ni a, tunah erawh kar khatah £65,000 a hlawh tawh–India pawisa chuan nuai 60 vel a ni!

Zirna lamah a hlawhchham avangin Deeney-a'n football-a eizawn tumin hma a la a, club hrang hrangah dilna a siam. Aston Villa-in ni li chhung trial turin an sawm a, a ṭhat chuan youth team-a ziah luh tur a ni. Amaherawhchu, Deeney hian ni hmasa pathumah a kal loh nghal avangin club an lawm lo a, contract an ziahpui duh lo.

Villa-in an hnawl vangin hnual deuh mah se club tenau Chelmsley Town-in a dilna an pawm tawh chu a thlan a ngai ta a, vanneih a siamin Walsall youth head coach Mick Halsall-a fapa a awm ve. Halsall hian a fapa khel a en pahin Deeney thiamna a hmu fuh a, inkhel a en ṭum hian Deeney hi rui chunga khelin goal sarih a khung tho a, 11-4 in an chak.

Walsall-in Deeney hi trial turin an sawm a, hetah pawh in trial hun hi a bawhpelh teuh hle. Chelmsley manager-in Deeney hi khum aṭangin a kai tho a, taxi a laksak vek hnuah a trial chauh. Footballer ni turin kawng dik a zawh chho a, Walshall-ah hian coach Chris Hutchings hnuaiah Deeney a vul hle.

Championship club aṭanga sawmtu a ngah avangin Deeney-a'n League One club-a khelh reng duh loin chhuah a dil a, Watford-in an chang fuh. Watford club legend a ni chho a, chanchin erawh khelmual chhung leh pawnah a la ngah zel.

June 25, 2012 khan Deeney hi inpheksualnaah a tel a, mi luah a tlawh avangin thla 10 chhung lung in tang tura tih a ni. English striker hi thla thum dawn jail bang a zut hnuah chhuah a ni a, a vawi khat 'case' neihna a nih avangin a hremna hi an tih tlemsak.

Buaina thlen hma thla hian Deeney hian a pa Paul Anthony Burke chu cancer vangin a chan a, hei hian a rilruah nghawng a nei niin a lang bawk.

Goal a khung ta

Deeney hian Watford tan hian season 10 a khelhna a ni a, Championship aṭanga Premeir League an kai theih nan khan goal 21 tehmeuh a khung.

English striker hian 2015-16 season-a Premier League an khelh hmasak berah goal 13 a khung nghal a, season liam ta khan FA Cup-ah Watford final a thlenpui bawk.

Deeney hian hun harsa tak aṭangin bul ṭan mah se Watford tana Premier League khel hnem ber (150), goal khung hnem ber (43) leh assists ngah ber (20) ber a ni a, legend tih loh rual a ni lo.