Police-in Aizawl FC an hneh nawn

I Day Football final rematch-ah Mizoram Police-in Malsawmfela goal hmangin Aizawl FC 1-0 in an hneh a, I League club chak tluang record an titawp bawk.

Nizan Zote Honda MPL9 inkhelah Police-in hneh loh an la tawng lo a, vawi li inkhelhah ṭum thum an cleansheet bawk avangin champion rinkai ber an ni leh ta.

Rozama thluak
Standly Rozario rawn thleng tawh mah se Aizawl FC a zawna vawi thum chakpuitu Lalrozama Fanai-in thuneihna thui tak a la nei niin a lang.

I League club-in match hnuhnung bera man of the match MS Dawngliana squad-ah an dah lo a, Jakob Lalhlimpuia'n chu hmatawngah a awm.

Mizoram Police coach Lalbiaksanga Colney-in a sawi lawk ang ngeiin striker F. Lalrinpuia (Valpuia) bul a ṭantir a, Malsawmfela bench-ah a awm thung.

A goal lo
I Day Football final rematch-ah team pahnih an fimkhur a, goal khung aiin goal venhim an ngai pawimawh zawk. Chutihrualin Jakob-a'n ṭan phatah chance

Aizawl FC goalkeeper Lalhruai-tluanga'n hun a duh a rei hret avangin Police striker Valpuia a inrawlh hman a, ball per goal zawnah a kal lo thung.

I League club tan Jeremy Laldinpuia a che ṭha a, mual vei lamah a langsar - Police right back Lalrinzuala Khiangte tan hnawksak a tling.

Dindina hian Hmangaihkima tan chance ṭha a siam a, FC Bethlehem laka chakna goal khungtu Hmangaihkima'n goal zawnah a pet lo.

AFC winger R. Lalthanmawia'n (Amawia) box pawn chiah aṭangin a pet a, wall a per hnuah goal sirah tak a kal. I League club hian box pawnah chiah tho freekick an hmu a, Immanuel HS Lalṭhazuala'n a pet ṭha tawk lo thung.

Police lamin chance ṭha an insiam meuh lo a, Valpuia cross chu Lalnunsanga'n (Talea) a hmang ṭha lo. Valpuia hi inhliam vangin a chawl rei a, MPL9 a khelh hmasak berah a khel chhe lo - Police game siamtu a ni.

Danglamna Sawmfela
First half-ah Police right back Rinzuala a chefuh tawk lo a, Dindina a ngam loh avangin yellow card a chawi hial. Second half-ah erawh Rinzuala a che ṭha a, Dindina a dahṭha.

Police-in chak ngei tumin bench aṭangin Malsawmfela an luhtir a, Ramhlun South striker hian danglamna a thlen zui.

Minute 62-naah Police-in mual dinglamah freekick am hmu a, Valpuia'n ṭha zeta petin Sawmfela'n a tauh goal. Sawmfela hian Aizawl FC tlarhnung a chhaih buai zui a, chance ṭha dang pawh insiam mah se goal a khung belh lo.

Aizawl FC pawh an insiamrem thei lo a, second half-ah Inter Village 2022 top scorer R. Ramdinthara te luhtir mah se Police tlarhnung an tibuai pha lo.

Cho leh cho
Aizawl FC coach Lalrozama Fanai chuan, "Kan vanduai mai mai a ni. Chance kan ngah daih zawk," tiin an chak loh a pawm lo.

Mizoram Police coach Lalbiaksanga Colney chuan, "Aizawl FC chak tluang tih tawp hi kan tum a ni a, kan khelh dan tur pawh kan ngaihtuah nasa. Tunah chuan kan hlawhtling ta," tiin an chak avanga a lawm thu a sawi ve bawk.

Police-in Aizawl FC a zawnin vawi hnih an hmeh ta a, an intawn lehna a hmuhnawm dawn. Champion lai AFC hian Police laka a zawna vawi thum tlawm an duh lo ang.

Round 4 - RG Stadium
Nimin Inkhel

Mizoram Police FC 1 - 0 Aizawl FC

MPFC: Malsawmfela 62'

MoM: Malsawmfela, AFC

Result kan hre hman lo

FC Venghnuai 07:00 PM Chanmari FC

September 23, Zirtawpni

Electric Veng FC 04:00 PM Chhinga Veng FC

FC Bethlehem 07:00 PM Chawnpui FC