Mizoram Premier League leh mimal chawimawina
Mizoram football thlak danglamtu tia sawi theih chu Mizoram Premier League hi a tih theih a, Mizoram Football Association leh a thawhpui Zonet hnathawh a ropui hle.
MPL awm hnuah Mizoramin Santosh Trophy-ah an champion a, Natonal Games-ah gold medal an la. Hei chauh hi a la ni lo, MPL club Aizawl FC chuan I League nomawi an chawi. AFC champion-na tuna I League ang hi a ni lo a, India rama league sang ber a nih bakah Indian player ṭha zawng zawng an tel vek.
India ram football kaphung a mumal chho zel a, MPL ṭan hnua khelh ṭan Indian Super League chu India rama inelna sang ber a ni tawh. ISL club tan pawh MPL hi a hlu a, an player zawnna hmun pakhat a ni.
ISL club-ah Mizo
MPL-a player ṭha chin chuan I League emaw ISL club emaw tan an khel thei zel a, chutihrualin Mizoram Police-a a ngheta lut tawh erawhin phai club an zawm lo thung. MPL hnuhnung bera best forward Isak Vanlalruatfela pawhin ISL club Odisha tan a khel mek.
MPL1 best player R. Laldanmawia pawh East Bengal leh Hyderabad tan a khelh kual hnuin NorthEast United tan khel mek. MPL3 best player Lalramchullova pawh I League club East Bengal, Mohun Bagan leh Mohammedan tan a khel tawh a, tun season-ah Chanmari FC-ah a rawn kir thung.
MPL4 best midfielder K. Lalṭhathanga (Puitea) chu ISL-ah player langsar a ni pha a, season liam ta khan Kerala Blasters chu ISL final a thlenpui. Puitea hian Blasters hma hian DSK Shivajians leh NorthEast United tan a khel bawk.
MPL6 best defender R. Laldinliana leh MPL7 best defender PC Laldinliana te chu ISL club Jamshedpur innghahna an ni pha a, MPL-ah pawh hming langsar ni ṭhin Ricky Lallawmawma te nen Jamshedpur tan an khel vek.
MPL-a mimal chawimawina dawng pha kher lo, ISL leh I League club ṭhaa khel ta an awm nual bawk. Jamshedpur defender Ricky hi entirna ṭha tak a ni thei ang.
Police an ṭhahnem
Mimal chawimawina dawngtu zingah hian tun season-a Mizoram Police player an ṭhahnem hle. Mizoram striker rinrawl ni reng ṭhin F. Lalrinpuia chuan mimal chawimawina vawi li a dawng tawh a, MPL1-ah Police tana khelin best forward a nih tawh bakah MPL4-ah Aizawl FC tan khelin mimal chawimawina mi pakhatin a lak theih (best player, top scorer leh best forward) zawng zawng a la bawk.
Tun season-a Mizoram Police captain Lalfakzuala leh vice captain Lalbiakhlua (Biaktea) te ṭum hnih top scorer an ni ve ve tawh. Police striker chhuanvawr Malsawmfela'n Chanmari FC tana khelh laiin ṭum hnih best forward chawimawina a dawng a, best player-a thlan a ni bawk.
Police midfielder pawimawh R. Malsawmtluanga'n Chhinga Veng leh Chanmari FC tana a khelh laiin best player chawimawina a dawng ve ve a, MPL6-a Chhingcows a champion ṭum khan best midfielder a ni tel bawk.
MPL hnuhnung berah foreigner an langsar a, Alfred Kemah Jaryan chuan season zawnin best player leh best midfielder chawimawina a dawng a, Aizawl FC defender Juuko Richard Kassaga chu best defender-ah thlan a ni bawk. Kuminah foreign player an inlan dawn lo a, Mizo ngeiin mimal chawimawina an dawng ang.