Bethlehem aia huaisen zawk Aizawl FC
Zote Honda MPL9-ah nimin khan champion lai Aizawl FC leh kai thar FC Bethlehem an inkhel a, I League club hi 2-1 in an chak.
FC Bethlehemin Lal-ruatpuia hmangin an khung hmasa a, Aizawl FC-in tawnhriat nei ṭha pahnih Lalchhawnkima leh MS Dawngliana hmangin an lehthal. AFC captain Chhawnkima hi man of the match a thlan a ni.
A hmuhnawm
Aizawl FC-in Chawnpui an hneh ṭum aṭangin player paruk ngawt bul ṭantu zingah an thlak a, an squad a chhah avangin team nêm zawk tihna erawh a ni lo.
Bethlehem-in MPL-a Chanmari FC champion pui tawhtu Isak Vanlalruatkima bul an ṭantir a, ARC player tharum ngah Isaka thlawp turin player che rang rual an dah.
Bethlehem-in ṭan phat aṭangin pressure an pe ṭha a, bul an ṭan ṭha zawk a, Aizawl FC an talbuai. FCB striker Isak-a'n a tharum a hmang ṭha a, AFC tlarhnung buaina belhchhahtu a ni.
Minute 8-naa right back Rosangpuia Zongte ball vawrhluh chu Isak-a'n AFC captain Lalchhawnkima a tihbuai avangin ball hi a kal tlang a, mual sir aṭanga chak taka rawn tlanlut Lalruatpuia'n goal-ah a chantir.
Ruatpuia hi Aizawl FC academy chhuak a ni a, senior team-ah a tel phak loh avangin Bethlehem lamah kalin a club hlui lamah a khung.
Bethlehem an khel ṭha chhunzawm a, an thawhrim bawk avangin Aizawl FC lam an che thei lo. Amaherawhchu MPL club thar tawnhriat ngah tawk lohna a lang a, corner kick an ven uluk loh avangin goal an chhuah.
Minute 30-naa Lalbiak-zuala (B-Tea)corner pet chu Bethlehem lamin an clear ṭha tawk lo a, B-Tea hian dinglam aṭang bawka vawrh lutin vengtu nei lo Chhawnkima'n a pet goal. Half time-ah team pahnih goal khung zat a inang a, Bethlehemin an bul ṭan ṭhat an hmang ṭangkai thei lo.
Danglamna Dawngtea
Aizawl FC-in player pathum ṭhawt an thlak a; right back Melory Laldinsanga, midfielder KC Larchhuakmawia leh forward Jessy Vanlalmuana te aiah R. Lalthanmawia, Hmangaihkima leh Lalchhan-hima Sailo te an lut.
Coach Rozama'n midfield a thuam chak a, Dawngtea a tawlh hma hret. Aizawl FC an insiamrem a, inkhel thunun thei lo mah se first half angin an bet tawh lo.
Aizawl FC an vannei tel a, first half-a yellow card leh warning hmu tawh Lalramsanga'n Bethlehem winger F. Lallawmkima khalh lut tur titlu mah se yellow card pek a ni lo - a vannei takzet.
Minute 72-naah player ṭha danglamna a lang a, Jeremy Laldinpuia ball pek luh chu Dawngtea'n rilru fim tak nena um lutin goalkeeper a pet khum.
FC Bethlehemin si phurh sut theihna tur an nei a, an penalty beisei pek an nih loh bakah hun tawp hma hretin Sena Ralte-in box pawn chiah aṭangin a pet over.
Chutihrualin Aizawl FC pawhin khung belh theihna an nei a, substitute Ramdinthara'n crossbar a pet per bakah penalty beiseitu Dawngtea'n penalty ni loin yellow card zawk a hmu.
A tawp thlengin a hmuh-nawm a, Aizawl FC an chak ta zawk.
Lawm leh lawm lo
Aizawl FC coach Lalrozama Fanai chuan, "Point thum hlu tak kan hlawh chhuak a, ka lawm. Squad ṭha tak kan nei a, ka player-te ka ringtawk. Hemi a nih avang hian player ka thlak nasa a, kan khingpui mil zelin player ka thlang," tiin an result leh a player neih dana a lawm thu a sawi.
FC Bethlehem coach Victor Lalbiakmawia chuan, "Red card chiang a ni a, an pe lo kha a mak ka ti hle. Man of the match-ah AFC defender an thlang a, chu chuan ka naute an khel ṭha tih a pholang," tiin Vanglaini a hrilh ve bawk.
FC Bethlehem 2 - 1 Aizawl FC
FCB : Lalruatpuia 8'
AFC: Lalchhawnkima 30';
MS Dawngliana 72'
MoM : Lalchhawnkima, AFC
Round 2 - September 13, Thawhlehni
Mizoram Police 2 - 1 Electric Veng FC
MPFC : Lalrinzuala Khiangte 2'; Lalhmunmawia 20'
EFC : David Lalchhuanawma 50'
MoM : F. Lalmuanawma, MPFC