VAR hi paih bo a ngai - Antonio

West Ham forward Michail Antonio chuan video assistant referee (VAR) a ngaina lo, video hmanga inkhel lai thil thlen dan ennawnna hmanrua hi football aṭanga lak bo leh mai ni se a duh thu a sawi chhuak hial.

Hammers hian Premier League an khelh hnunhnung berah VAR thutlukna an tuar. Chelsea lakah si phurh an sut niah an inngai, mahse hun tawp dawna an goal khung hi VAR hmanga ennawn a nih hnuah an hnawlsak, 2-1 in an chak lo.

West Ham leh Blues inkhel bakah, Newcastle United leh Crystal Palace inkhela VAR thutlukna hi a hnuah Premier League lam pawhin a dik tawk lo niah an ngai a, sawi zui pawh a hlawh hle - VAR sawiseltute tan ṭan hmun ṭha an siamsak.

Antonio chuan, "VAR chungchang hi chu ka duh loh thu ka sawi fo tawh, paih bo daih tur a ni. A bik takin tun hnaia thutluknate kha chhut kir ila, thil âtthlak leh ṭha lo tak a ni," tiin a sawisel nasa hle.

Kum 2019 aṭang khan Premier League-ah VAR hi hman ṭan a ni a, hman a nih tirh season aṭanga chhut chuan thutlukna siam sual pawh a tlem tawh viau ni chuan an hria, a hmaa an tih dik zat 82% chu 94% zetah a sang chho tawh niin an sawi thung.

Chelsea nen an inkhela thil thleng chungchang sawi zuiin Antonio chuan, "Dan leh hrai chu player leh match official lam hian kan hre vek, thil thleng chu a hmutu leh tehtu a zirin thutlukna a danglam thei.

"Chuvangin VAR hman a nih hian engkim a dik vek tihna a ni lo, referee thutlukna zel a ni tho. Referee ten thutlukna an siam tho avangin engkim an kutah a awm," tiin tun hma angin referee chuan engkim ti fel nghal mai se a duh.