Forest player 22-na Aurier

Premier League club Nottingham Forest an bazar zo thei lo, nipui bazar hun a zawh hnuah pawh player an lak belh zel. Tottenham Hotspur defender hlui, tuna club nei loa awm lai Serge Aurier an lalut leh ta.

Ivory Coast captain hi Villarreal tana a contract chu a tawp a, club nei loin a awm. Free transfer a nih avangin bazar hun inkhar hnuah pawh a duh zawng club a zawm thei, tun hnaia Forest player lakluh thar 22-na a ni hial.

Aurier hian August 2017 khan Paris St-Germain aṭangin Spurs a zawm, kha tih laia a man zat chu pound maktaduai 23 a ni. North London club tan season li a khel a, 2019 Champions League final a thlenpui hial a ni.

Kum 2021 khan Tottenham nen inhriatthiam tawnnain a contract hi tihtawp a ni a, season hmasa khan Villarreal tan a khel. Spanish club tan hian inelna hrang hrangah match 24 a khel a, heng zingah hian Champions League match nga a tel.