Inter Milan tan Bayern an ṭha hret

Tun season Cham-pions League-a group 'hot' ber pawl tura ngaih, group C-a an match hmasa berah Barcelona an chak a, hetihlai hian team ṭha pahnih inkhelah Bayern Munich chuan 2-0 in Inter Milan an hneh bawk.

Bayern tan hian Thomas Muller chuan chance duhawm tak a nei a, mahse, Sadio Mane siamsak ṭha zet chu goal-ah a chantir thei lo - San Siro-ah goal khung loin German club hi rei tak erawh an awm lo.

Minute 25-naah khelmual lai vel aṭanga Joshua Kimmich ball thlawh luh chu, Leroy Sane chuan ṭha zeta lo dawngin ball a control a, Inter keeper Andre Onana chu tlanhelin, hmahruaina goal a khung.

Second half-ah Bayern hian inkhel hmuhnawm an phochhuah chhun-zawm a, Sane leh Kingsley Coman ten rang zeta in 'one-two' chungin Inter tlarhnung an ṭhiat a, Sane-a'n a hmawr a bawk.

Manchester City winger hlui 'shot' chu Inter defender D'Ambrosio chuan goal line aṭanga lo petchhuah tum mah se a thei lo a, an lamah a lut a, Inter an tlawm chiang.

Bayern tan Liverpool aṭanga Bundesliga champion pantu Sadio Mane a hmuhnawm lehpek a, mahse, Inter keeper Onana-a'n hming chher lehzualna remchang a neih chu a dansak.

Julian Nagelsmann-a enkawl Bayern hian an league match hmasa pathuma hnehna an chan zawn hnuin Borussia Mönchengladbach leh Union Berlin chu 1-1 ve vein an inhnehtawkpui a, Bundesliga-ah point 11 hmuin pathumna an ni a, point 12 neitu SC Freiburg leh Borussia Dortmund an phak lo.

Hei vang hian fan-te pawh Inter lakah an hlauthawng a, mahse, Bayern-in an thiam an la theihnghilh lo tih pholangin, khualmualah inkhel an thunun a, Serie A club ṭha lakah goal hnih an khung a ni satliah lo - 56% ball an chang a, vawi 21 shot neiin, vawi 11 chu target-ah a kal a, Inter tan Bayern an ṭha hret.