Mizoram Police = Chhinga Veng FC

Zote Honda Mizoram Premier League Season 9-ah I Day Football champion Mizoram Police-in chakin bul an ṭan thei lo a, Chhinga Veng nen 0-0 in an inhnehtawk.

Police coach Lalbiak-sanga Colney-in player a siksawi nasa a, bul ṭantu zingah captain Lalfakzuala leh Malsawmfela te a telh lo. Chhingcows pawhin an player neih thar India junior team-a khel ṭhin Lalengzama Vangchhia leh F. Lalrohlua te bul an la ṭantir bik lo.

First half-ah Chhinga Veng game a mawi zawk a, inkhel thunun viau mah se chance mumal a awm lo.

Midfielder Johny Lal-remruata ball pet chu Police keeper F. Lalmuan-awma tan dan harsa a ni lo. Chutihrualin Lalrinzuala erawh Police tlarhnung tan a hnawksak hle.

Second half-ah BS-a'n Sawmfela, Fakzuala leh Lalbiakhlua (Hlutea) te a luhtir a, goal bulah an hlauhawm sawt. Chhinga Vengin midfield la thunun tho mah se Police-in chance ṭha an ngah zawk.

Sawmfela'n box chhungah fing takin a cross a, goal ruakah Fakzuala'n a khung thei lo. Sawmfela hian Chhingcows defender Abel Lalruatfela tihsual zarah chance ṭha bik a nei a, keeper RS Lallawmzuala chauh a hmachhawn hnuah a ti goal thei lo.

Chhinga Veng lamin Vanlalrinpuia hmangin hun ṭha an nei a, Chhingcows forward ball pet hi keeper Muanawma tan dan a harsa lo.

Inkhel tawp lamah ni a tlak tawh avangin inkhel a hmuhnawm sawt a, goal hmuh tur erawh a awm phah lo - player che vel (movement) a rangin training an nei ṭha tlang tih a hmuh theih.

Chhinga Veng 0- 0 Mizoram Police
MoM : H. Lalbiakthanga, Aizawl FC