Chawnpui lakah AFC squad ṭhat a lang

Mizoram Premier League Season 9 match hmasa berah Aizawl FC chu Chawnpui FC lakah ṭum hnih hnufual mah se I League club-in 4-2 in hnehna an chang.

Chawnpui coach Lalsangzuala Hmarin a hmachhawn châk ber AFC an hmachhawn a, David Lalrinmuana freekick leh MC Malsawmzuala penalty hmangin ṭum hnih hma hruai mah se an goal neih an hum thei lo.

I League club tan Lalbiakzuala, Jakob Vanlalhlimpuia, Jeremy Laldinpuia leh David Lalhlansanga ten goal khat ṭheuh an khung

Class is permanent
Chawnpui FC tan bul ṭantu zingah David Lalrinmuana a tel a, Aizawl FC captain hlui hian minute ngana lekah box pawn aṭangin freekick mawi zetin a khung.

Chawnpui hian goal khung tho mah se an lawm a kim lo. AFC keeper Lalhruaitluanga'n Chawnpui forward Laltlanzova a titlu a, red card chawi thei a ni. Hruaia hi hnawhchhuah chu ni se, Under 18 player a nih avangin AFC hi player 10-a an khelh a ṭul bakah substitution pahnih an siam a ngai ang.

Aizawl FC an vannei chhunzawm a, B-Tea cross tur chu goal-ah a lut. Minute ruknaah 1-1 a ni lehnghal. Sanga enkawl Chawnpui an khel ṭha a, AFC defender Munez-a'n Avida lakah penalty a chawi.

Tawnhriat nei ṭha MC-a'n 'cool' takin a pet a, goalkeeper Hruaia bumin minute 17-naah hmahruai nawnna goal a khung.

Sub awmze nei
AFC coach Lalrozama Fanai-in game thlak danglam turin Inter Village 2022 best player Lalramsanga a luhtir a, inkhel kalhmang a dang daih.

Ramsanga awm hnuah AFC midfield a nghet ṭha sawt a, first half chhungin hma an hruai nghal. Minute 34-naah BT-a corner pet chu Jakob-a'n a tauh goal a, Chawnpui tlarhnung an muthlu.

Minute 38-naah Ramsanga freekick chu Tharpuia'n box chhungah la thlain a ball pek chu Dindina'n a pet goal. AFC-in 3-2 a hma an hruai tak avangin nuamsa zawkin an khelh theih phah.

Squad a chhah
Chawnpuiin halftime-ah player pathum ngawt an thlak a, Lalsawmzela pawh lut thar zingah a tel. Sawmzela zarah Chawnpui goal nawr a na sawt a, goal erawh a luhpui tel lo.

Aizawl FC-in squad an neih chhahzia a lang zui a; bench aṭangin K. Lalrinfela (Mafela), David Lalhlansanga, R. Lalthanmawia leh HK Lalhruaitluanga te an luhtir. Player lut tharte hi bul ṭan tlak vek an ni a, lut lo zingah MPL-a vawi thum best forward ni tawh MS Dawngliana te an la awm zawk.

AFC player neih ṭhat a lang a, Indian Arrows captain hlui Chhantea Sailo ball pek chu substitute David-a'n lalutin goal kilah a khung. I League club 4-2 in an chak.

MPL club an inbei tawk tlang dawn tih a lang a, inkhel a hmuhnawm a, player an ṭha tlangin club hrangah an insem rual ṭha hle.

Chawnpui FC 2- 4 Aizawl FC
CHFC : David Lalrinmuana 5'; MC Malsawmzuala 17' (P)
AFC : Lalbiakzuala 6'; Jakob Vanlalhlimpuia 34'; Jeremy Laldinpuia 38'; David Lalhlansanga 70'
MoM : Lalbiakzuala, AFC