Semifinal-ah Swiatek a lut

Hmeichhe tennis world number 1 Iga Swiatek chuan a vawi khat nan US Open semifinal a lut. Nimin zing quarterfinal inkhel hmuhnawm takah Polish nula hian Jessica Pegula chu 6-3, 7-6 (7/4) in a hneh.

French Open champion hian semifinal-ah chuan Aryna Sabalenka a hmachhawn leh ang. Season kal laiah Swiatek hian Grand Slam pali zinga pathumah semifinal a thleng phak vek. Wimbledon-ah kha chuan match thumna lekah a tla thung.

Kum 21 mi Swiatek chuan, "Inkhel hautak ka paltlang zo chiah a, semifinal hi tun aiin a harsa zawk dawn. Sabalenka hian service a nei ṭha a, a ball vuak a nain tharum a ngah bawk, chuvangin a tir aṭangin theihtawp chhuah a ngai dawn," a ti.

Quarterfinal bikah Swiatek hian a service vawi nga a hloh a, a tihsual vanga a khingpuiin point a hmuh hi vawi 32 a tling bawk. Hnehna chang tho mah se a khel ṭha tawk lo a, siamṭhat ngai leh siamrem ngai lai a nei nual.

Semifinal thlir zuiin Swiatek chuan, "Tournament ṭhenkhatah chuan semifinal khel turte hian mipui an barakhaih ṭhin, tun ṭumah chuan a khel tur tak ten kan khel dawn ni te pawhin ka hria. Keimah ni loin, midang pathum pawh hi an ṭha hlawm hle.

"A vannei ber an champion dawn tih a chiang tawh a, kan pali zinga a tu pawh hi champion thei kan ni," a ti a, a ṭhiante dang chu champion phu khawpa thiam leh theihna nei sang vek an nih thu a sawi lang tel bawk.

Swiatek hmachhawn tur Sabalenka hian quarterfinal inkhel dangah Karolina Pliskova chu 6-1, 7-6 (7-4) in a hneh, hnehna a chan hnuah US Open a khelh ṭhat chhan chu Wimbledon khelh thei loh vang kha a nih thu a sawi.

Russia leh Ukraine indona avangin, Belarus nula Sabalenka hi Wimbledon a khelh phalsak a ni lo. Seeded parukna Sabalenka chuan, "Wimbledon khelh theih loh khan ka nunah nghawng a nei, rilru paukhauh zawk min siamsak.

"Dam reng chunga Grand Slam khelh theih loh kha chu a hrehawm ve hle. Mahse, min tipaukhauhtu zawkah ka hmang a, chu chuan tun tournament ka khelhna atan hian nasa takin min pui," tiin a sawi.

Semifinal lehlamah seeded pangana Ons Jabeur leh seeded 17-na Caroline Garcia te an inhmachhawn ve thung ang.