Inkhel hautakah Alcaraz a chak

Spanish rawlthar, theihna nei sang leh hmabak êng tak Carlos Alcaraz chuan a vawi khat nan Grand Slam semifinal a thleng. Nimin zing inkhel hautak takah Alcaraz hian Jannik Sinner a hneh - US Open semifinal chu harsa takin a inhlangkai.

New York khawpuia tennis stadium hmingthang ber Arthur Ashe Stadium-ah an inkhel tawk takzet a, darkar nga leh minute 15 teh meuh an inkhelh hnuah Alcaraz hian 6-3, 6-7(7), 6-7(0), 7-5, 6-3 in hnehna a chang.

Alcaraz-a'n hnehna chang turin a khingpuiin match point a hmuh tawh chu a pawtthla. United States lamah chuan inkhel hi zing lam dar 2:50-ah an zo chiah a, US Open an khelh tawh chinah chuan inkhel a zawh har ber ṭum a ni hial.

Rawlthar pahnih
US Open champion thar an awm dawn a, a tu emaw berin a vawi khat nan Grand Slam nomawi an la dawn tih pawh a chiang tawh. A che fuh ber nih tumin rawlthar an inel, kum 19 mi Alcaraz-a khingpui Sinner pawh hi kum 21 mi chauh a la ni.

Rafael Nadal (2005) hnua mipa player Grand Slam semifinal thleng thei naupang ber Alcaraz chuan, "Engtin nge hnehna ka chan theih mai tih pawh hi ka la ngaihtuah chhuak thiam phak lo, ka khelh dan leh chet vel dan zawng zawng kha a mak.

"Jannik Sinner kha player ropui a ni a, a theihna sanzia chu tennis ngainatuten an hre vek, ani ka hneh thei chu thil lawmawm tak a ni. Inrintawkna pawimawhzia ka hre nawn a, a tawpah chuan beiseina hi a hnu khartu a ni zel tur a ni," tiin a sawi.

Hmabak Tiafoe
Quarterfinal inkhel dangah Frances Tiafoe chuan Andrey Rublev a lo hneh ve bawk, anni pahnih pawh hi an inkhel tawk hle. Darkar hnih leh minute 36 chhungin tualchhung player hian 7-6 (7-3), 7-6 (7-0), 6-4 in hnehna a chang, straight set ni mah se an inkhel tawk hle.

Andy Roddick-a'n kum 2003 khan US Open nomawi a chawi a, a hnu lamah American player zingah Flushing Meadows-a hlawhtling leh thei an la awm lo, kum 24 mi Tiafoe tunah chuan a ti leh thei hmasa a ni mek - match hnih chak a la ngai thung.

Tiafoe hian a point hnuhnung ber chu 'aces' hlap chhuah hmangin a hmu a, Arthur Ashe Stadium-a inkhel entu thawm a ṭha hle. Semifinal-ah Alcaraz nen an inkhel dawn, tun hnai an khelh dan thlir chuan a hmuhnawm khawp ang.

Number 1 tur?
Last 16-ah champion lai Daniil Medvedev a tla a, Russian tlangval hi a tla a ni satliah lo - world ranking lam pawh na takin a nghawng, kar leha ranking chhuak tharah chuan a chung bera a awm chu a hloh dawn.

Semifinal lut zingah Alcaarz leh Casper Ruud te chu an champion a nih chuan, nomawi bakah number 1 nihna hauh thei tur an ni. Player ropuite an her liam mek a, anni ho hian tennis khawvel an luah chho dawn ta niin a lang.

French Open 2022 finalist Ruud hian semifinal lehlamah Karen Khachanov a hmachhawn ve thung dawn. Khachanov hi chu seeded 27-na a ni a, tualchhung tlangval Tiafoe pawh seeded 22-na a ni, anni pahnih tan hi chuan champion pawhin number 1 nih theihna kawng a inhawng lo.