Kan chak turah ka ngai - Chhinga

Vawiiin tlai dar 3:00 hian RG Stadium-ah Chanmari FC leh Electric Veng FC te an inkhel dawn.

Chanmari hi an captain hlui Rochhingpuia enkawlna hnuaia MPL an khelh hmasak ber tur a ni ang.

I Day Football-ah khan team pahnih hi an inkhel tawh a, Electric Vengin goal an khung hmasak hnuah Chanmari FC-in 2-1 in an lehthal.

Chanmari coach Rochhingpuia chuan, "Kan chak turah ka ngai. Kan inpuahchahna a ṭha a, inelna hmachhawn turin kan inpeih. Inhliam tlem a zawng chu kan nei a, kan buai phah lo ang," tiin Vanglaini a hrilh.

Chanmari hian phai lam thlenga tawnhriat nei ṭha Lalramchhulova, Malsawmzuala bakah Tata Trusts COE aṭanga inzir chhuak player an awm nual. RG Stadium a khel tur an nih bawk avangin Chanmari hian passing game hmuhnawm an khel thei ang.

Electric Vengin Mizoram defender Lalmawizuala an lalut thar a, an intawn hmasak aiin an tlarhnung a phui ṭha tura ngaih a ni.

EFC coach Vanlal-sawma Colney chuan, "Player thlir mai chuan a ṭha lo zawk chu kan ni alawm, mahse khelmualah theihtawp kan chhuah dawn. Khelh kan awlsam lo ang," tiin Vanglaini a hrilh.

Electric Veng hian midfielder fing Vanlalremsanga (Tetea) leh H. Zawnhmingthanga (Thanga Hmar) bakah MPL-a ṭha tih hriat tawh David Lalchhuanawma te an kawl a, Chanmari tan hna a awlsam dawn lo.