Spurs chhanhimtu Richarlison

Tottenham Hotspur forward Richarlison chuan Champions League-a a match hmasa berah Spurs tana a goal hmasa ber a khung a, a goal hnih hmangin Premier League club hi Marseille lakah 2-0 in hnehna a chanpui.

Group D inkhelah Tottenham-in goal khung an harsat a, mikhual team Marseille-in an khel ṭha zawk - mahse, minute 47-naah French club defender Chancel Mbemba chu Son Heung-min laka professional foul avangin hnawhchhuah a ni a, London club an phur sawt.

Hun tawp nan minute 14 chauh a awm tawh tihah Ivan Perisic-a cross chu Richarlison chuan goal-ah a chantir a, minute 81-naah an goal hnihna a khung leh bawk a, Spurs an chak.

Spurs hian vawi 18 ngawt Marseille lamah shot nei mah se vawi hnih chiah target-ah a kal a, mahse, a goal ve ve miau avangin hnehna an chang!

Inkhelh zawhah goal hnih khungtu Richarlison hian a pa chu a kuah a, social media lamah he thlalak hi tarlang zuiin, "Kum tam tak chhung ka bei a, ka kiangah i awm reng ṭhin. Kei leh ka beiseinate beidawn pui lo a, ka kianga i awm avangin lawmthu ka hrilh che a, zanina ka kiang ngeia i awm avang hian ka hlim lehzual a ni.

"Duhthusam duhawm zawkte pawh nei zel turin kan bei dun zel ang, ka pa, ka lawm e," tiin a ziak a, Richarlison mittui leh hlimna hi fans tam takin an ṭawmpui ngei ang.

Spurs awmna, group D inkhel dangah Sporting Lisbon chuan 3-0 in Europa League champion Eintracht Frankfurt an hneh a, Marcus Edwards, Francisco Trincao leh Nuno Santos ten goal khat ṭheuh an khung.