Bethlehem-in phuba an la thei ang em?

FC Venghnuaiin I Day Football-ah 5-1 zetin FC Bethlehem an sawp. Vawiin chhun dar 12:00 hian MPL9-ah club pahnih hi RG Stadium-ah an inkhel dawn.

Thla liam taa team pahnih inhmachhawn ṭum khan Bethlehemin goal khung hmasa mah se Venghnuaiin goal ngain an chhanglet. MPL club thar hian vawiin hian phuba an la thei dawn em tih chu hunin a hrilh ang.

Bethlehem hi phuba la thei turin an inthuam ṭha. ISL leh I League thlenga tawnhriat nei ṭha Sena Ralte an lalut a, a captain nghal dawn. Tawnhriat nei ṭha dang Isak Vanlalruatkima leh F. Malsawmzuala te an lak belh a, I Day Football ai chuan an ṭha tawh zawk.

Venghnuai pawhin Kolasib I Day Football 2022-a best defender Lalrempuia, Armed Veng South captain C. Ramdinmawia leh Joshua Malsawmkima te an lalut. Rempuia hian bul a ṭan nghal a rinawm.

Venghnuai coach Lalrindika Hmar chuan, "MPL hi chu a harsa a, sawi lawk thiam a har. Awlsam taka point hmuh theih a ni lo ang," tiin Vanglaini a hrilh a, MPL khel tura a inpeih tawh thu a sawi.

Fans nei ṭha veng pahnih an insu dawn e.