Italy-ah Liverpool an zawr

Season hmasa Champions League final-a Real Madrid an ngam loh hnu lawkah Jurgen Klopp-a'n season tharah final an khelh leh tur thu a sawi a, "Khawiah nge season thar final khelhna tur? Istanbul maw? Hotel min book sak nghal rawh u," a ti a, a naute a ringtawk hle.

Mahse, season thar a her chhuak ta ngei a, tun season-a Champions League-a an match hmasa berah Liverpool an mualpho a, ni lo, a zawrin an zawr tih zawk tur a ni e - Napoli lakah 4-1 zetin an tlawm a, goal tam zawk chhuah thei an ni.

Liverpool tan Piotr Zielinski chuan goal hnih a khung a, Andre-Frank Anguissa leh Giovanni Simeone ten goal khat ve ve an khung bawk a, Liverpool tana Luis Diaz goal khung chu mualpho zualpui khuhna chauh a tling.

An zawr
Inkhel ṭan aṭanga minute ngana lekah James Milner-a'n handball avangin penalty a chawi nghal a, Zielinski tan goal-a chantir turin harsatna a awm lo - hemi hma hian Victor Osimhen chuan post a pet per der tawh!

Liverpool an insiamrem hman lo - minute 18-naah Virgil van Dijk chuan Osimhen a rap a, VAR hmanga ennawn a nih hnuah penalty pek a ni. Mahse, Liverpool-in Alisson an nei hlauh a, an him hram.

Jurgen Klopp-a naute an harh phah chuang lo. Minute 31-naah Reds tlarhnung pherh zarzoin Anguissa chuan a khung chhunzawm a, Diego Simeone fapa Giovanni Simeone chuan Champions League-a a match hmasa berah an goal thumna a khung bawk.

Mualphona
Liverpool-in chawlhlawk hmain goal thum an chhuah a, second half-a tho tur chuan thilmak an mamawh - mahse, insiamṭhat mamawh zawk bawk hi an chesual a, Zielinski chuan second half ṭan aṭanga minute hnihnaah Alisson chip khumin, an goal lina a khung.

Reds player zinga a khel en tlak awmchhuna chhal theih Luis Diaz chuan ṭha zetin si phurh a rawn sut ṭhen a, goal dang erawh a lut tawh lo - Liverpool tlarhnung a pherh takzet a, midfield-in awmzia an nei lo a, tlarhma an bil bawk.

Mohamed Salah-a'n a phu ang ngeiin, hlawh tam tak neiin Anfield-ah contract thar a ziak a, mahse, tun season-a a khelh dan erawh chhuan tur a awm lo a, Napoli lakah tihsual a ngah takzet a, Liverpool fan-te hmuh ṭhin Salah kha hmuh tur a la awm lo.

Nuihzatna
Liverpool boss Klopp chuan, "Inrinni zanah Wolves kan hmachhawn dawn a, an nuih a za ngawtin ka ring. Anni chuan tun hi min hmachhawn hun lai tak a ni, an ti ngeiin ka ring a, keipawhin ka ti tho ang. Kawng tinrengah hma kan sawn a ngai a ni," a ti.

Klopp chuan sawi chhunzawmin, "Football-ah chuan a chinfelna a awm zel a, kan khel ṭha lo tih chu a chiang. Hnathawh tur ka nei a, ka mawhphurhna a ni a, mahse, kan tihsual thlir turin hun ka la mamawh," a ti a, insiamṭhat an mamawh thu a sawi.

German coach chuan, "First half-ah kan khel chhia a, mahse, goal thum em chu kan chhuah khat. Goal-a Alisson nei chunga khati zat chhuah chu kan tichhe hle tihna a ni," a ti - group A inkhel dangah Ajax-in 4-0 in Rangers an sawp a, Edson Alvarez, Steven Berghuis, Mohammed Kudus leh Steven Bergwijn ten goal khat ṭheuh an khung.