I Day Football champion ka châk ber - Sanga ; Tlai dar 2:30-ah Chhinga Veng Vs BVT

Great Sports I Day Football-ah Chhinga Veng FC leh Bethlehem Vengthlang FC ten vawiin tlai 2:30 hian Lammualah semifinal an khel dawn.

Aizawl veng lian pahnih inkhel tur a nih avangin khelmual chhunga inbeihna chauh ni loin entu lamah pawh inel tawk tura ngaih an ni.

I Day Football a hlu
Chhinga Veng FC coach Lalsangzuala Hmar hian Mizoram Premier League-ah Chanmari FC a champion pui tawh a, MFA Super Cup-ah Chhingcows leh Bethlehem Vengthlang te nomawi a lak pui tawh bawk, a hmabak chu I Day Football a ni.

Sanga hian head coach hna a chelh hnuah I Day Football vawi hnih hmachhawn tawhin semifinal leh final a thleng tawh. BVT a enkawl laiin final-ah Aizawl FC lakah an vanduai a, season liam ta khan Chanmari FC enkawlin semifinal-ah Ramhlun North lakah an chak lo.

Chhingcows coach Sanga chuan, "Mahni inpuanna pawh a ni ang a, practice ṭan tirha kan ṭawngṭai zawh apiangin I Day Football-a champion ka duh thu hi ka sawi ṭhin. Tun season-a nomawi pathum lak theih zinga ka lak châk ber chu I Day Football hi a ni a, champion tur pawhin kan thawkrim a ni," tiiin MPL ai pawha I Day Football nomawi a duh thu Vanglaini a hrilh.

Chhinga Veng hian tun sea­son-ah match 10 khel tawhin an la chak vek a, goal 67 tehmeuh an khung bawk.

MFA Super Cup best forward Malsawmfela (5 goals), MS Dawngliana (4) leh Laldampuia'n (4) ten tun inelnaah goal 13 an khung tawh. Vawiina en uluk tur erawh Bethlehem Vengthlang tlangval Laldingngheta a ni a, season liam taa BVT captain hian Chhinga Veng match hnuhnung berah goal hnih a khung.

BVT phur lai
Bethlehem Vengthlang FC-in MFA Super Cup quarterfinal-ah Chhinga Veng 1-0 in an hneh lo a, tunah erawh residential camp te neiin an phur vanglai tak a ni.

BVT hian an match hnu­hnung berah semifinal lut tur­in Ramhlun North FC 2-0 in an hneh a, hemi ṭuma goal mawi khungtu Hualngohmun tlangval Vanlalthanga'n match hnuhnung pahnihah goal a khung ve ve a. Inelna ṭantirh match hmasa pahniha goal khungtu B. Zoramthara a awm a, hmuh châkawm erawh Army Green captain PC Lallawmkima a ni.

Samthang tlangval PC-a hian nikum khan Durand Cup-ah Army Green a champion pui thei - tun inelnaa goal la chhuah ziah Chhinga Veng tlar­hnung an din khawng a ṭul ang.

BVT secretary Lalruatfela Hmar chuan, "Supporter lam pawh an phur chho leh ṭan a, keini hi chu chhiat lai tak tak kan nei lo. Chhinga Veng hian entu lamah hian min rawn elpha ve ṭanin ka hria a, kan hnung zuitu an ni," tiin entu lamah chuan an ṭhat zawk thu a sawi.

Chhinga Veng coach thawk­rim Sanga pawhin, "Ṭantu kan nei ṭha a, min auh phur hi chuan inkhelh a nuam lehzual ṭhin. BVT nen pawh hian an puihna kan mamawh ang," a ti.

I Day Football-a goal khung hnem ber (goal 21) Chhinga Veng leh goal chhuah tlem ber BVT (goal 3) inkhel tur hi a hmuhnawm ang.