Nomawi duh Neymar tel loin PSG an chak
Inrinni zan khan Paris St-Germain chuan tun season-a an match hmasa ber an khel a, ngaihven hlawh ber chu Neymar a ni - Barcelona forward hlui hian Zirtawpni khan khawvela footballer manto ber ni turin French club hi pound maktaduai 200-in a zawm a, Zirtawpni tlaia media a hmachhawn ṭumin, "Inkhelh nghal ka duh a, ka taksa lamah harsatna a awm lo," tiin a sawi.
Neymar ṭawngkam vangin media-in Parc des Princes lam an hawi a, mah se Brazil captain hi a transfer chungchangah lehkha tihfel ngaite tihfel hman vek a nih loh avangin a inlan lo. Neymar inlan lo mah se PSG erawh an chak tho a, Amiens SC chu 2-0 in an hneh - he inkhela goal-te hi Uruguay forward Edinson Cavani leh Javier Pastore ten an khung a ni.
Nomawi chawi turin
Zirtawpni tlaiah media hmaah Neymar pholan ni tawh mah se fan-te hmuh tur erawhin Inrinni zan an inkhelah pholan chauh a ni thung. Brazilian forward chuan, "Chona thar hmachhawn tura he hmuna ka lokal thei hi ka lawm takzet a ni," a ti a, "Nomawi a tam thei ang ber chawi ka duh a, chu ka beisei nomawi chawi tur chuan fan-te min ṭawiawmna ka mamawh dawn a ni," tiin a sawi.
PSG fan-ten Neymar an
ṭawiawm ṭha dawn tih a chiang - Zirtawpni ringawta Neymar-a hming chuanna jersey an hralh zat chu 10,000 a tling a, season hmasa tluana jersey 526,000 hralhtu club hian Neymar-a kawr man aṭang ringawt pawhin pound maktaduai 200 an insenna engemaw zat hi an hmulet dawn tih a chiang.
Sum vang a ni lo
Neymar-a'n sum vangin PSG a pan tih chu mi tam tak ngaihdan a ni a, mah se Brazilian forward hian sum vang a nih loh thu a sawi thung. A chhiah chawi tur zawng zawng paih hnu vek pawha kum khata pound maktaduai 26 hlawh tur forward chuan, "Sum vanga PSG ka pana ngaitute hi chuan min hrechiang tawk loah ka ngai a, sum ka um ve ngai lo. Sum duh vanga PSG pan tur ni ila, ram dangah club dangah ka khel ang. Heti zawnga miin ngaihdan an nei hi pawi ka ti a, PSG-in min rin tawknaah erawh ka lawm em em thung," a ti.
PSG chairman Nasser Al-Khelaifi pawhin a player thar hi a chhan nghal a, "Neymar hian ka thil tumte hi tihhlawhtlin theih niah a ngai a, chu kan ruahmannate tihlawhtling tura phurna nasa tak nen kan hnen hi a rawn pan a ni. Kan pawisa pek aia tam zawk hi a hlawh thei tih kan hria a ni," tiin a forward chu sum hmang ringawta thlem lut an nih loh thu a sawi.
PSG tan hlawkna?
French club-in pound maktaduai 200 chuang player pakhat tan an seng huam a, zawhna awm chu khelmual pawn lamah Neymar hi an hlawkpui thei ang em? tih hi a ni. Brazilian forward hi social media lamah chuan infiammi zinga huhang ngah ber pawl a ni a, Twitter-ah followers maktaduai 30.8, Instagram-ah maktaduai 78.9 leh Facebook-ah maktaduai 59 ngawt a nei - amah entawntu, a hak ang hak tum, a inchei dan anga inchei tum ṭhalai an tam dawn tihna a ni.
Neymar hian kum khatah sponsorship aṭangin pound maktaduai 20 a lalut ziah a, Nike ringawtin kum khata an pek zat hi pound maktaduai 10.8 a tling - Cristiano Ronaldo an pek zat nen a inang. Al-Khelaifi chuan, ''Neymar kan neih hma chuan ka club hlutna hi dollar tluklehdingawn khat a ni a, tunah chuan dollar 1.5 tld a ni tawh. Vawiina Neymar man hi a to in ti a ni mai thei a, mah se tun aṭanga kum hnih thum hnuah chuan to in ti tawh lo ang. Neymar aṭang hian sum tam tak kan siam dawn a ni," tiin a sawi.