Boxer 211 inlanna tur LPS Pro Fight

Tata Yodha 4x4 LPS Professional Fight-ah boxer 211 chuang an tel dawn tih a chiang ta a, tualchhung boxing inelna lian Promotional Fight hnuhnung ber 2019 aiin khel tur an tam zawk tihna a ni.

Nimin khan inelna hmachhawn tur boxer-te hi Zarkawt YMA Recreation Centre, Aizawlah an hriselna endik a ni a, an inbuk nghal bawk. Hming thehlut zinga mi inlan lo ṭhenkhat awm mah se khel thei turin 211 an ziak lut.

Weight hrang pangaah title an inchuh dawn a, fly (kg 48-52)-ah mi 75, bantam (kg 52-55.3)-ah mi 36, feather (kg 55.3-59)-ah mi 48, light (kg 59-63.5)-ah mi 32 leh welter (kg 63.5-70)-ah mi 20 an tel dawn.

LPS Promotional Fight hnuhnung ber 2019 khan Mizo boxer 194 bakah, state ṭhenawm Arunachal Pradesh, Meghalaya, Manipur, Assam leh Sikkim aṭanga sawm bik 12 nen, an vaiin boxer 206 an tel a, tun ṭumah hian boxer pangain tel an tam zawk.

August 29, Thawhtanni hian LPS Office, Zarkawtah fixture tar chhuah tur a ni a, Nilaini zan aṭangin R. Dengṭhuama Indoor Stadium, Mualpuiah inhnek an ṭan nghal dawn a ni.

Mizoram Boxing Association leh LPS-in kum 2009 aṭanga 2019 chhungin hlawhtling takin Promotional Fight vawi riat a buatsaih tawh a, tun ṭumah hian kalphung tidanglamin professional boxing beihpui thlak a ni dawn.

Boxing inelnaa la tel ngai lo an ṭhahnem hle a, tawnhriat an neih dan a zirin boxer-te hlawm hnihah ṭhen an ni dawn a, tawnhriat nei tawhten stage sang aṭangin an khel ṭan chauh ang.

Inlan tur zingah - India super lightweight number 1 Vanlalawmpuia, 2015 Pro Fight bantamweight champion HC Lalramfela, professional boxing vawi khat khel tawh Stephen Lalramsan Varte te chu mipui ngaihven zual tur zinga mi an ni dawn.