A zawnin Marin a chak leh ta

Hliam vangin Carolina Marin-i'n nghakhlel taka a thlir Tokyo Olympic a khel thei lo a, hun rei tak chhung a chawlh hnuah a inkhel thei ve leh tawh - Spanish star hian tunah chuan world champion nih a tum ngam leh tawh.

Badminton World Championship khelh laiah Marin hian nimin khan He Bingjiao chu 16-21, 21-15, 22-20 in a hneh, game hmasa ber hloh mah se a hnuhnung pahnihah chuan player ṭha leh chungchuang bik a nihna a lantir.

Awlsam taka chak erawh a ni bik lo, game hnuhnung ber an khelh lai hian a khingpuiin match point vawi li a hmuh chu a pawtthla vek. Chinese nula laka a hnehna chan zawh hian a ze pangngai a chhuah leh a, lawm avangin aw rawl a chhuah ring leh hle.

Kum 29 mi Marin chuan, "Kei chuan nomawi hi ka la sawi ngam lo, Pathiannia match hnuhnung ber khelh zawh hunah a chak zawk ka ni a nih chuan ka sawi ngam chauh ang. Ka tan chuan eng chena sang nge ka thlen theih tih hriat a pawimawh ber.

"Tunah chuan quarterfinal ka lut ve leh chauh a ni a, hmabak a la tam hle," tiin a sawi, world number 1 hlui hian a match hmasa zawkah YZ Wen a lo hneh tawh a, semifinal lut tur chuan Japanese nula Akane Yamaguchi a hneh leh a ngai thung ang.

Khup hliam vangin Marin hi kum 2019 khan thla kua tehmeuh a lo chawl tawh, nikum khan a khup hliam lehin a chawlh pawh a ngai rei leh hle. Hliam na tak vawi hnih a tawrh hnuah ngai a awh leh thei ang em, tih chu zawhna lian tak a ni.

Marin chuan, "Hliam na tak vawi hnih tawrh hnuah chuan ka thil thlir dan pawh a danglam, champion ai chuan nuam ti taka badminton khelh leh theih ringawt kha ngaihtuah hmasak a ngai a, kum khat aia rei player ṭha hmachhawn lo ka nih avangin eng match mai pawh hi a awlsam lo.

"Amaherawhchu, tournament ka hmachhawn a nih chuan theihtawp tak meuh ka chhuah ṭhin a, tun ṭumah pawh hian a sang thei ang ber chu thlen leh ngei ka tum dawn," tiin a sawi, hliam nei loa a khel tluang a nih chuan midang tana hmachawn châkawm lo zinga mi a ni leh ang.