September 1-ah MPL9 Kick Off

Mizorama football inelna sang ber Mizoram Premier League (MPL) Season 9 chu September 1, Ningani zan hian Dawrpui Multipurpose Hall-ah kickoff a ni dawn. Mizoram Football Association (MFA) leh Zonet ṭangkawpin an buatsaih MPL hi Covid-19 hri leng vangin kum hnih chhung neih a ni tawh lo a, kuminah neih a ni leh dawn ta.

Tun season MPL-ah hian champion lai Aizawl FC, Chanmari FC, Chawnpui FC, Electric Veng FC, Chhinga Veng FC, FC Venghnuai, Mizoram Police FC leh FC Bethlehem te an inel dawn. Bethlehem hi MPL kaithar an ni a, an inpettlinna erawh November 2019 daih tawh kha ni mah se hri leng vangin Mizoram football inel sang ber hi an la hmachhawn lo a ni.

Kick Off chu
Kum 10 liam ta khan Mizoramin football bung thar a kai theih nan MFA-in football kalhmang a thlak a, first division chu titawpin Zonet Cable TV nen ṭangkawpin football inelna changtlung zawk Mizoram Premier League a buatsaih.

Tualchhung football-in hlut a hlawh tawk loh avangin 'publicity' pawh nasa taka tih a ni a, mipuiin an ngaihven theih nan khelmual pawn lamah ram an zauh nasa hle. Aizawl hmun hrang hrangah MPL tih chuanna banner lian tar a ni a, Mizo zaithiam leh hla phuah thiam lar Zorock-a'n MPL theme song 'Ni e maw' tih chu phuahin a sa nghal bawk.

Inelna ṭan hmain 'Kick Off' buatsaih a ni a, MPL hmasa bera Kick Off-tu chu India football legend Bhaichung Bhutia a ni. Kick Off hian nasa takin MPL a chawi sang a, a hnu lamah pawh an chhunzawm zel.

Kick Off vawi riat neih a ni tawh a, Chanmari YMA Hall-ah ṭum li neih ni tawhin Hawla Auditorium-ah ṭum hnih neih a ni a, I&PR Auditorium leh Lammualah ṭum khat ve ve neih niin kumina neihna tur Dawrpui Multipurpose Hall hi an vawi khat hmanna tur a ni.

MFA president Lal Thanzara'n ṭum hnih MPL hi a kick off tawh a; AIFF vice president Larsing Ming, Reliance Sports general manager Chirag Tanna, Sports minister Zodintluanga leh India international player Jeje Lalpekhlua ten an kick off tawh bawk.

MPL4 Kick Off-ah ṭum dang ang lo takin grassroots hmeichhia leh mipa naupang ten an kickoff thung. MFA-in MPL8-a kickoff-tu tur an la puangzar lo.

MPL chu
Mizoram Premier League-in tualchhung football a thlak danglam a, MPL awm hnuah Mizoramin Santosh Trophy leh National Games nomawi an chawi a, MPL club Aizawl FC-in I League nomawi an chawi hial. Mizo club AFC chauh hi North East aṭanga I League nomawi chawi thei an la ni.

Aizawl FC hi MPL-ah pawh record nei ṭha ber an ni a, champion lai niin inelna hnuhnung pahnihah an champion bakah MPL3 leh MPL4-ah an champion bawk. Dinthar FC chu champion hmasa ber an ni a, Chanmari FC-in MPL2 nomawi an chawi hnuah MPL5-ah an champion leh bawk.

MPL6-ah Chhinga Veng an champion a, Mizoram football inelna sang ber hi ṭum riat neih ni tawhin club pali an champion tawh a ni.

Nivia Ball
MPL hmasa berah MPL puala siam ball 'Tumpang' hman a ni a, hei hi a hlawhtlin chhunzawm loh avangin Nivia Shining Star hman chhunzawm a ni. Nivia Shining Star hi tualchhung inelna hrang hrangah hman a ni ṭhin a, tun ṭum Inter Village 2022-ah pawh khan an hmang.

MPL1 aṭanga MPL6 thlengin Nivia Shining Star hman a ni a, MPL7-ah Nivia kut chhuak tho Nivia Antrix hman a ni. Antrix hi beisei angin a ṭha lo a, a ting nasat deuh avangin MPL8-ah Nivia Shining Star bawk hman a ni.

MPL8-ah ball thar hman a ni dawn a, MFA thawhpui Nivia siam 'Nivia Dominator 3.0' hman a ni ang. Inter Village 2022 final-ah khan sports minister Robert Romawia Royte-in MPL-a hman tur Nivia Dominator 3.0 hi a tlangzarh. Tualchhung inelnaah Nivia Dominator 3.0 hman a la ni lo a, eng nge a an dawn, tih chu hunin a hril ang.