Bournemouth defender thar Senesi

Premier League club Bournemouth chuan defender Marcos Senesi chu Feyenoord aṭangin an lalut a, kum li chhung atana contract ziahpuiin a man zat erawh tarlan a ni lo.

Kum 25 mi defender hian Feyenoord tan season thum chhungin match 116 a khel a, goal riat a khung - season hman zawh takah khan match 50 a khel a, Europa Conference League final a hruai thleng a ni.

Argentina tana vawi khat inlan tawh defender hian an ram club San Lorenzo aṭangin a profes-sional zinkawng a zawh ṭan a, June thla khan Estonia lakah ram tana a match hmasa ber a khel.

Senesi hi Italian thisen kai a ni a, June 2022-a European champion Italy leh Copa America champion Argentina ten 2022 Finalissima an khelh dawn khan ram pahnihin an ko ve ve a, a tawpah Argentina kohna a chhang ta zawk.

Bournemouth chief executive Neill Blake chuan, "Kan hnena rawn kal a thlang hian club kan nihna anga pan kan châkawmzia a pholang a, Argentina international, European football-a tawnhriat nei kan lakluh hian club kan nihna anga kan hmachhawp chiang takin a pholang a ni," a ti.

Tun season an league match hmasa bera 2-0 a Aston Villa hnehtu Bournemouth hian, Senesi hi nipui transfer-a an player lakluh pangana a ni a, ani hma hian Barcelona keeper Neto, Middlesbrough midfielder Marcus Tavernier, Blackburn Rovers midfielder Joe Rothwell leh West Ham right back Ryan Fredericks te an lo lalut tawh bawk.