Zanin dar 12:30-ah UEFA Super Cup Real Madrid Vs Eintracht Frankfurt

UEFA Super Cup vawi 47-na chu zanin dar 12:30 hian Real Madrid leh Eintracht Frankfurt ten Olympic Stadium, Helsinki-ah an khel dawn. Real leh Frankfurt inkhelah hian Semi-Automated Offside Technology (SAOT) hman a ni ang.

SAOT hmang hian offside thutlukna rang zawkin a siam theih dawn a, season liam ta khan Arab Cup leh Club World Cup-ah enchhin ni tawhin kum tawpa neih tur FIFA World Cup-ah pawh hman a ni dawn.

Real Madrid hi Champions League champion an ni a, Super Cup nomawi hi vawi sarih an champion tawh. Frankfurt erawhin sulhnu chhuan tur an nei lo a, season liam ta khan a vawi hnih nan Europa League-ah an champion. German club hian Champions League-ah kum 1959 khan pahnihna an ni a, Los Blancos vawi 14 champion tawhna Europe club tana inelna lian ber UCL-ah nomawi an la chawi ve lo.

Europa champion
Eintracht Frankfurt hi season liam ta khan Bundesliga-ah 11-na an ni a, point 42 chauh an hmu. Europe-a an chet ṭhat tawk loh chhan hi Europa League-a an insawrbing vangah a ngaih theih a, nomawi chawi tur hian Barcelona leh West Ham United te an hneh hnuah final-ah Rangers an hneh.

Oliver Glasner hote hian tun season-ah Mario Gotze an lalut a, Germany-in 2014 World Cup nomawi an chawi thehna tura final-a chakna goal khungtu hi hriselna lam ṭhat tawk loh vangin a nih tur ang ni pha ta lo mah se PSV-ah season ṭha tak a hman avangin team tana la ṭha tura ngaih a ni.

Kum 30 mi Gotze an lakluh bakah seaosn liam taa an player pawimawh Colombian forward Rafael Santos Borré, Japanese midfileder Daichi Kamada, Serbian midfielder Filip Kostic bakah Danish midfielder Jesper Lindstrom te an chelh thei a, squad ṭha tak an la nei.

Frankfurt hian season ṭan nan DFB Pokal-ah FC Magdeburg 4-0 in an hnemh a, Gotze hi man of the match-a thlan a ni hial. Mahse Bundesliga match hmasa berah champion lai Bayern Munich lakah an mualpho a, 6-1 ngawtin an chak lo.

Keeper ṭha Kevin Trapp pawhin tih theih a nei tlem a, goal net aṭanga ball chhar chu a hna ber a ni zawk. Bavarians nena an result aṭanga thlir chuan Frankfurt tan Real Madrid hneh hi chu a harsa ang.

Real nge nge
Real Madrid-in Cristiano Ronaldo an chhuah khan tlakhniam lam an pan dawn niin a lang hman a, mahse insiamṭha turin hun rei an mamawh lo - season liam ta khan European champion an ni a, an squad a ṭha tel bawk.

La Liga khelh ṭan a la ni lo a, Real Madrid hian friendly match-ah an hmelma Barcelona 1-0 in hneh lo a, Mexican club America nen 2-2 in an inhnehtawk. An match hnuhnung berah erawh Juventus 2-0 in an hneh a, Super Cup khel turin an inpeihah a ngaih theih.

Nipui transfer bazarah Real hian Kylian Mbappe la thei lo mah se player langsar Antonio Rudiger leh Aurelien Tchouameni te an lalut a, an squad ṭha sa an ti chak. Real hian Marcelo, Isco leh Gareth Bale te contract an pawhsei sak lo a, season liam ta thlirin an thutlukna hi a pawmawm hle.

Real hian UCL final-a Liverpool an hneh ṭuma first eleven bawk an hmang nawn thei a, chumi awmzia chu Vinícius Júnior leh Karim Benzema ten hmun pawimawh a chang ang. Midfield-ah pawh Tchouaméni bakah Eduardo Camavinga la dah ṭhain Toni Kroos, Casemiro leh Luka Modric te an awm thei. Hei hian an squad chhahzia a sawifiah a, Real hi chak turin a buk a rit zawk hle a ni.