I Day Football - Judgement Day ; Chanmari vs Police; Electric Veng vs Chhinga Veng
Vawiin hian I Day Football-ah group B-ten group match hnuhnung ber an khel dawn a, Lammual inkhel tur hi inkhel hmuhnawm bik a ni dawn. A chhan chu group B-a awm Mizoram Police FC, Chhinga Veng FC, Electric Veng FC leh Chanmari FC ten point thum vek an hmu a, semifinal la lut thei vek an nih rualin tla thei vek an ni.
Chhun dar 12:00-ah Chanmari leh Mizoram Police te an inkhel dawn a, tlai dar 2:30-ah Electric Veng leh Chhinga Veng te an inkhel ang. I Day Football-ah Mizoram Premier League club pariatte intluk tawkzia a lang a, tualchhung football ngainatute tan chanchin lawmawm a ni.
Chanmari Vs Police
Mizoram Police hi kum 2012 khan I Day Football-ah an champion a, Chanmari pawhin kum 2013-ah I Day Football nomawi hi an chawi. Thilmak tak erawh Police leh Chanmari hi an champion chhunzawm zo lo.
Tun ṭumah pawh hian team pakhat zawk hi chu an champion dawn lo tih a chiang tawh. Vawiin inkhel hi Police leh Chanmari tan chuan final tluk zeta pawimawh a ni. Team pahnih hian chakin bul an ṭan a, amaherawhchu an match hnuhnung bera an chak loh ve ve avangin dinhmun harsaah an awm phah.
Chanmari hi an club legend Rochhingpuia'n a enkawl a, transfer bazarah thawm nei lian mah se training-na hun a tam tawk loh avangin an ṭhat dan ber tur an la hre lo. An ṭhat dan tur an la inzawng kual.
Electric Veng an hneh ṭumin Lalramchullova chu defence laiah an dah a, Chhinga Veng an hneh loh ṭumah Chullova hi mual sirah dahin Benjamin J. Lalrinliana chu Joseph Lalnunpuia nen an inkawptir. Amaherawhchu match hnuhnung berah hian goal thum an chhuah avangin tlarhnung hi a phui phah lo tih a lang a, goal an khung loh avangin tlarhma lam pawh insiamṭhat a ṭul bawk.
Mizoram Police-in Chhingcows 2-0 a an hneh hnuah Electric Veng lakah goal an khung hmasa a, mah se EFC hian 2-1 in an lehthal. Electric Veng player Amos Lalnienga chu minute 73-naah hnawhchhuah a ni chungin Police hian siphurh an sut thei lo a, Lalbiaksanga Colney hoten insiamṭhat an mamawh hle.
Hriat tel atana ṭha erawh Police hi damlohnain a tibuai a, an ṭhat dan berin Electric Veng lakah an inlan lo. Chutihrualin Chanmari nen an inkhelh hunah an kim thei lo a nih pawhin chhuanlam neih a thiang lo - Police hi an squad thlirin semifinal lut ngei tur an ni.
EFC vs Chhingcows
Electric Veng hi champion lai an ni a, Chhinga Veng hi kum 2017 leh 2018 khan an champion thung. An record thlirin team pahnih hi tun hnaia club ṭha pahnih tiin a sawi theih a, player an neih naupan bawk avangin inkhel nung ṭha tak an chhawp chhuak thei ang.
Electric Veng hian match hnuhnung bera Police an lehthal avangin inrintawkna nasa tak an nei dawn a, chutihrualin Chanmari an hmachhawn ṭuma goal khungtu Amos Lalnienga an chhawr theih loh avangin channa nasa tak a ni thei ang.
Chhinga Veng tan an striker pawimawh Lalrinzuala'n a theihna a rawn pholang tawh a, Serchhip tlangval hi EFC tan ven uluk a ṭul ang. Chhinga Veng hian I Day Football hnuhnung bera best goalkeeper ni lai RS Lallawmzuala an kawl a, Chanmari laka goal an venhim ang bawkin Electric Veng lakah goal venhim an tum ang.
Group B dinhmun
• Mizoram Police FC, Chhinga Veng FC, Electric Veng FC leh Chanmari FC ten point thum vek an hmu a, semifinal an la lut thei vek.
• Mizoram Police : Chanmari laka point an hmuh chuan semifinal
an lut.
• Chhinga Veng : Electric Veng laka point an hmuh chuan semifinal
an lut.
• Electric Veng : Chhinga Veng an hneh chauhin semifinal an lut ang.
• Chanmari FC : Mizoram Police an hneh chauhin semifinal an lut ang.