August 1 aṭangin I Day Football

Tualchhung football season hawnna atana hman ṭhin I Day Football chu August 1 aṭangin Lammualah khelh ṭan a ni dawn a, Mizoram Premier League club pariatte an inel ang. July 28, Nilaini khan fixtures tihchhuah a ni a, final hi India ramin zalenna a neih ni August 15-a khelh tur a ni.

Group A-ah I League club Aizawl FC bakah Chawnpui FC, FC Bethelhem leh FC Venghnuai te an awm dawn. Group B-ah champion lai Electric Veng FC bakah Chanmari FC, Chhinga Veng FC leh Mizoram Police FC te an awm ang.

I Day Football hi Covid-19 vangin kum 2020 leh 2021 te khan neih a ni lo a, kum 2019 kha neih hnuhnun ber niin Electric Veng chuan final-ah FC Venghnuai 2-1 a hnehin an champion.

Mizoram Football Association chuan Covid-19 vanga hun rei tak a inkhelh theih loh avangin, season bul ṭan nan LBS Suzuki All Mizoram Inter Village Football Tournament 2022 a buatsaih a, Mizoram hmun hrang hrang aṭangin team 203 telin a hlawhtling hle.

July 19, 2022 khan final khelh a ni a, entu mipui Lammual khat tlata pung khawm chuan inelna hlawhtlinzia a sawifiah. MPL club-te pawhin Inter Village hmangin player an zawng a, an social media account hmangin an player lakluh tharte thiam takin an puang hlawm.

Aizawl FC-in thawm an nei ring ber a, Inter Village Football champion Champhai Kanan aṭangin best player Lalramsanga leh top scorer R. Ramdinthara te an lalut. Chutihrualin tualchhung football-a ṭha sa tiha sawi theih striker ṭha MS Dawngliana leh Emmanuel HS Zuala te an lakluh tel avangin tranfer boruakah an thamral mai a rinawm bik lo.

Chawnpui FC pawhin Champhai Kanan champion-na tura player pawimawh leh final-a man of the match Laltlanzova (Zozoa) an lalut a, Chawnpui enkawl tur hi Mizo coach ṭha Lalsangzuala Hmar leh Mizoram captain hlui Lalrinchhana Tochhawng a ni tih hriat a ṭha bawk.

Inelna hnuhnung ber finalist FC Venghnuai leh MPL club thar FC Bethlehem te pawhin transfer-ah thawm an nei ring a, heng team pali hi group khatah an awm. Team pahnih chauhin semifinal an luh dawn avangin chefuh leh chesual an awm dawn.

Group B-ah champion lai Electric Veng, transfer-a thawm nei ring pahnih Chanmari FC leh Chhinga Veng FC bakah player ṭha sa awm khawmna Mizoram Police FC te an awm. Group A ai mahin group B buk a rit zawk a, mak ang reng tak erawh champion lai Electric Veng hi team nem berah an ngaih theih zawk.

I Day Football 2022 Fixtures
Group inṭhen dan
Group A : Aizawl FC, Chawnpui FC, FC Bethlehem, FC Venghnuai
Group B : Electric Veng FC, Chanmari FC, Chhinga Veng FC, Mizoram Police FC

Fixtures
Group Stage
Lammual - August 1, Thawhṭanni
FC Bethlehem 12:00 Noon Aizawl FC
FC Venghnuai 2:30 PM Chawnpui FC
Lammual - August 2, Thawhlehni
Chanmari FC 12:00 Noon Electric Veng FC
Chhinga Veng FC 2:30 PM Mizoram Police FC
Lammual - August 4, Ningani
FC Venghnuai 12:00 Noon FC Bethlehem
Chawnpui FC 2:30 PM Aizawl FC
Lammual - August 6, Inrinni
Chhinga Veng FC 12:00 Noon Chanmari FC
Mizoram Police FC 2:30 PM Electric Veng FC
RG Stadium - August 8, Thawhṭanni
FC Bethlehem 11:00 AM Chawnpui FC
Aizawl FC 1:00 PM FC Venghnuai
Lammual - August 9, Thawhlehni
Chanmari FC 12:00 Noon Mizoram Police FC
Electric Veng 2:30 PM Chhinga Veng FC
Semifinal - Lammual
August 11, Ningani
Win of Group A 12:00 Noon Run of Group B
Win of Group B 3:00 PM Run of Group A
Final - Lammual
August 15, Thawhṭanni
Win of SF1 3:00 PM Win of SF2