Durand Cup-ah ISL club khel vek dawn

Asia khawmualpuia tournament upa ber Durand Cup chu August 16-ah khelh ṭan a ni dawn a, Indian Super League club-te an inlan kim vek dawn.

Kum 1888 aṭanga neih ṭan inelnaah hian team 20-in inelna an hmachhawn dawn a, ISL club 11 bakah I League team panga leh Indian Armed Forces aṭangin team pali an tel bawk ang.

Durand Cup-ah hian team 20 chu, group paliah, group khata team panga zel awmin ṭhen hran an ni a, group tina a sang pahnihin knockout round an lut dawn a ni.

Inelna hi Salt Lake Stadium, Naihati Stadium, Kishore Bharati Stadium (West Bengal), Khuman Lampak Stadium (Imphal, Manipur) leh Indira Gandhi Athletic Stadium (Guwahati, Assam) ah te khelh tur a ni dawn a, ṭum dang zawng aiin ngaihven a hlawh zual a rinawm.

FC Goa chu Durand Cup-ah hian champion lai an ni a, nikum final-ah khan I League club Mohammedan SC chu 1-0 in an hneh - inkhela goal awmchhun hi Spanish midfielder Edu Bedia-a'n extra time-a a khung a ni.

Group ṭhen dan
Group A: Bengaluru FC, FC Goa, Indian Air Force, Jamshedpur FC and Mohammedan
Group B: ATK Mohun Bagan, East Bengal, Mumbai City, Indian Navy, Rajasthan United
Group C: Chennaiyin FC, Hyderabad FC, NEROCA, TRAU, Army Red
Group D: Kerala Blasters, Odisha FC, NorthEast United, Sudeva Delhi and Army Green