Engtik nge Lammuala inkhel entu tam ber ṭum ni ang?

Mizoram football inpui Lammual hi RG Stadium awm tawh hnuah pawh a hlut dan a la ngai reng a, hman aṭanga tun thlengin Mizo footballer-ten final an khelh châkna hmun a la ni reng.

England-a Wembley Stadium an ngaihsan ang thoin Mizoten Lammual an ngaisang a, tun thlengin Assam Rifles kutah la awm mah se a hlutna hi a nep phah lo. Lammual artificial turf hi February 28, 2011 khan Lammualah hawn a ni a, hetih hunlaia Sports & Youth Services minister Zodintluanga chuan 'Inaugration of artificial turf ground' hi a kaihruai a, hetih hunlaia chief minister Lal Thanhawla chu khuallian a ni bawk.

Artificial turf pawh chhe thei a ni a, kum 11 a tlin meuh chuan a inkhelh theih ṭawk ṭawk a ni ber. LBS Suzuki All Mizoram Inter Village Football 2022 final-ah Mizoram deputy chief minister Tawnluia chuan, "Lammual hi I League inkhelh theihna turin chei leh ruahman sorkarin a tum," tiin a sawi a, football ngainatute tan chanchin lawmawm a tling.

Lammual an chei ṭha ang a, helai hmun hian football inelna lian zawk hi a thlen ngei a rinawm hle. Chutihrualin tun hnai kum 20 chhung pawhin helai hmun hian inkhel ropui a lo thleng fo tawh.

Engtik ṭumah nge entu an tam ber, tih chu inhnialna a ni thei ang. Chutihrualin inkhel entu tam bik an awm ṭum hi chu ṭum liah a chhal theih. Kum 2003 khan Mizoramin National Under-16 Football Championship vawi 26-na a thleng a, final-a Mizoramin Meghalaya 2-0 a an hneh ṭumah Lammual khat tlat an pungkhawm.

Lammualah entu tam ṭum hi a awm fo. Theihnghilh theih miah loh tur chu Santosh Trophy qualifier-a Mizoram leh Manipur inkhelh ṭum kha a ni a, Mizoram tan final round lut turin chak ngei ngei a ngai. January 31, 2014-a inkhelah hian Mizoramin 2-0 in hnehna an chang a, entu chu ṭhahnem tak an ni.

Mizoramin khual ṭha Bundesliga club Hoffenheim a mikhual ṭum khan entu an ṭhahnem leh bawk. May 13, 2014-ah hian Mizoram XI leh Hoffenheim an inkhel a, ticket man pawh Rs 500 daih te a ni chungin entu an tam - hawina apiangah lu hlir a awm tih tur a ni.

All Mizoram Inter Village Fotoball 2022 final-a entu mipui kha khawi zozai aṭanga rawn kal khawm nge tih hriatthiam a har zawk. Sialhawk boruak a ṭha em em a, Champhai Kanan lam an nep chuang lo. July 19, 2022-a inkhel entute chuan mipui ṭhahnemzia kha an la sawi zui reng ang.

August 30, 2003: National Under-16 Football Championship vawi 26-na final-ah Mizoram leh Meghalaya an inkhel a, Mizo mipui zawng zawngin kawr sen an ha a ni ber. Final-ah Mizoram tan Lalthlengliana leh Lalhmingliana ten goal an khung a, 2-0 in hnehna an chang. Inkhelh banah field sira inkhel entu mipui Lammualah an tlan lut a, khelmual a khat hma hle.

January 31, 2014: Mizoramin Santosh Trophy an champion ṭuma an zinkawng pawimawh ber tia sawi theih chu qualifying round-a Manipur nen an inkhelh ṭum a ni. Mizo mipuiin football hmanga India awp an châk. Banner-ah pawh, "Kan duh ber chu champion. Kan la awp dawn India' leh 'We will give you the worst 90 minutes ever' tihte a inziak. R. Laldanmawia'n minute 82-naah chakna goal a khung a, thawm rin dan chu pui tak a ni. Injury time-ah Zico Zoremsanga'n chak nemnghehna goal a khung leh bawk.

May 13, 2014: Tun thlengin Lammuala Hoffenheim an rawn inkhel kha mumang ram ang mai a la ni reng. Hoffenheim kha team satliah an ni lo a, Bundesliga team ṭha zinga mi an nih bakah an player ṭha an rawn hruai bawk. German club tan Anthony Modeste, Eugen Polanski leh Jiloan Hamad ten goal an khung a, Mizoram XI lakah 3-0 in an chak. Santosh Trophy qualifier angin mipuiin pressure an nei lo a, Liverpool forward ni ta Roberto Firmino leh player ṭha dang an hmuh avangin an hlim em em thung.

Zahna Chibai: Sialhawk VC Team-in champion team Champhai Kanan VC Team chu zahna chibai 'Guard of Honour' an pe a, infiamna khawvelah chuan hei aia inchawimawina ropui hi a awm chuang lo.

Sialhawk an pui keih keih: Sialhawk VC Team-in champion ta lo mah se Mizo mipui rilru an hneh hle. 'Unzi Lasi' pawh tun hnai bikah Lammual chauh ni loin Aizawl ṭawngkam lar ber pakhat a ni hial.

Lawmthu sawina ṭawngṭai: Champhai Kanan game mawizia an sawi fo a, a hmuna en ṭhinte chuan an ṭawngṭai tamzia an sawi tel bawk. Mizoram champion an nih chiah pawhin Champhai Kanan hian Lammualah ṭhingṭhiin lawmthu sawina ṭawngṭaina an nei a, an chet dan mawi tak hian Mizote thinlung a hneh hle.

Lammual hi I League inkhelh theihna turin sorkarin chei leh ruahman a tum. - Tawnluia, Mizoram deputy chief minister

Final khelh ṭan hma drone aṭanga lak