Zaninah Aizawl FC Vs Gokulam Kerala FC

Mizoram Premier League champion Aizawl FC chuan zanin dar 7:15 hian EMC Corporation Stadum-ah Gokulam Kerala an hmachhawn dawn a, Standly Rosario hote tan dinhmun siamremna hun ṭha a ni. Aizawl FC hian match nga an khelh aṭangin point ruk an hlawh chhuak a, pakhatna East Bengal aiin point hnih chiahin hmu tlem mah se an point hmuh a inan tlan avangin paruknaah an awm pha chauh.

Aizawl FC-in kumhluia an match hnuhnung berah Punjab FC nen 3-3 in an inhnehtawk a, hemi ṭum hian Mizo club hi an vanduai hle. December 20 zanah RG Stadium-ah inkhel hmuhnawm bik hmuh tur a awm. Mizo club tan Jonathan Lalrawngbawla'n minute lina lekah goal a khung a, amaherawhchu Makan Winkle Chothe hmangin Punjab-in an sut nghal bakah Sergio Barboza Junior-a'n goal mawi bik a khung bawk.

Aizawl FC an nung thar a, Rochharzela goal hnih hmanga Punjab lehthalin chak thei dinhmunah an ding. Amaherawhchu injury time-ah ball-in Lalramhmunmawia kut a per a, hun pek belhah pawh minute ruknaah Sergio Barboza Junior-a'n siphurh a sut. Mizo club-in point thum hmuh theihna tur hun ṭha an bawhpelh.

Aizawl FC-in January thla transfer an hmang ṭangkai a, MPL club danga an mamawh player pali an lalut. MPL best goalkeeper Lalremruata leh best goalkeeper ni ngun ber Lalawmpuia kawl mah se an player hlui Zothanmawia chu Chanmari aṭangin an lalet.

Tlarhnung thuam chak nan Chhinga Veng aṭangin Lalthlahlova (Patea) an lalut a, winger hmuhnawm Rochharzela leh MPL top scorer MC Malsawmzuala chu Electric Veng leh Chhinga Veng aṭangin an senglut bawk. Keeper T. Mawia tih loh player pathum hi Gokulam hmachhawn turin an zin nghal.

Gokulam Kerala hian Aizawl FC nen point ruk ve ve an hmu a, Kerala club hian Mizo player Lalromawia chu bench aṭangin an luhtir ṭhin. An innghahna tak erawh kum 30 mi Henry Kisekka a ni a, Ugandan forward hian goal hnih khung tawhin Aizawl FC tlarhnung tan a hnawksak ang.

AFC coach Standly Rosario-a'n a player thar aiin a player neihsa chungah rinna a nghah rih a rinawm a, match hnuhnung bera Punjab nen an inkhelh ṭumin Richard Kassaga leh Joseph Adjei te inkawp an rintlak. Tlarhma lam erawh Abdoulaye Kanoute-a'n beisei a la pha tawk lo a; Mizo player William Lalnunfela, Rochharzela leh Isak Vanlalruatfela ten mawhphurhna an lak theih a ṭul ang.