Chelsea-ah Sterling a kal fel ta

"Kan Lawm E" tia Man-chester City thlahna thu kan hriat hnu lawkah Raheem Sterling chuan Chelsea jersey a ha zui a, Blues hian pound makatduai 50 sengin England forward hi an lalut.

Kum 27 mi Sterling hian season nga daih contract a ziak. A contract hi a hmang zo a nih chuan kum 32 mi a ni tawh dawn, an pawt sei kher lo a nih pawhin Stamford Bridge-ah vanglai hun a hmang zo thei dawn tia sawi theih a ni.

Beiseina nen
Premier League nomawi vawi li chawi tawh Sterling chuan, "Football ka khelh hun chhungin hlawhtlinna tam tak ka lo chang ve tawh, hmabak tam tak ka la nei bawk. Chumi tihlawhtling tur chuan Thomas Tuchel-a enkawl Chelsea hi ka zawm.

"London khawpui hi ka bul ṭanna leh chenna hmun a ni a, kar tin mai Stamford Bridge-ah ngei min ṭantute hmaa inkhelh hlan ka nghakhlel tawh hle. Khelmual chhunga ka hna pangngai thawh chhunzawm ka châk tawh," a ti.

Chelsea hian Los Angeles-ah season thar inbuatsaihna an nei mek, he hmunah hian Sterling hian a zawm. Blues hian tlarhma a khel thei player an nei nual a, a ṭha zawnga inelna hautak a hmachhawn dawn.

Ṭangkai dawn
Roman Abramovich thlaka Chelsea-in neitu thar Todd Boehly an neih hnuah Sterling hi an player lakluh hmasak ber a ni a, coach Tuchel chuan team tana ṭangkai leh anmahni squad tichak theitu pawimawh tak a nih ngei a beisei thu a sawi chhuak.

Blues manager Tuchel chuan, "A khelh dan leh kan team a in mil ngei ang, kan tan chuan ani lakluh theih hi a lawmawm. Ka hmuh dan chuan English football huangah huhang a nei lian, a kum zat pawh hi a ni aia naupang zawkte tiphur turin a tawk hle.

"Tawnhriat a ngahin a hlawhtling tawh hle, heti chung hian a dang duh belhin a la tuihal reng. Hei hi naupang ho entawn a tan a ṭha, ani ang hi Premier League mamawh chu an ni," tiin a player thar lakah beisei a nei sang hle a ni.

Tlarhnung lam
Thomas Tuchel-a enkawl Chelsea hian squad thuam chhak an la tum nasa. Sterling an lak fel hnuah Napoli defender Kalidou Koulibaly chu inremna an neihpui a, London club tan kum li daih contract a ziak ang.

Kum 31 mi Koulibaly chauh hi an la duhtawk lo. Manchester City aṭang bawkin Nathan Ake lak tumin hma an la mek a, ani nen pawh hian an inhnaih tawh hle. Paris Saint-Germain defender Presnel Kimpembe an be bawk.

Tun nipui bazar chhungin Antonio Rudiger leh Andreas Christensen ten Real Madrid leh Barcelona an pan a, tlarhnung laia khel ṭhin pahnih an chhuah avangin an hmunruak hnawh khat tur an mamawh, an duhzawng player an la thei dawn niin a lang.

Kalphung thar
Russian sumdawng hausa Abramovich-a'n Chelsea a siam lian a, nomawi chawina tur a nih chuan pawisa a ui ngai lo. Manager pawh a thlak kual nasa, kum 19 chhungin manager nghet ringawt pawh 10 a nei hman, a nghet loa enkawl lailawktu an awm nual bawk.

Club neitu thar hian thil thlak kual zung zung ai chuan, neihsa thawm ṭhat leh tih ngelngheh lam an uar dawn nia sawi a ni. Tuchel pawhin Pep Guardiola leh Jurgen Klopp te hnuhma hnutchhiah ang neih ve ngei a duh.

German manager Tuchel chuan, "Theih ni se Pep leh Jurgen te anga sulhnu neih ka duh, tuna kan dinhmun erawh harsa taka an hlawh chhuah a ni. Chelsea tan hian hlawhtlinna lian dang chan a, hun rei zawk enkawl theih ni se ka duh dan a ni," tiin a sawi.