Zarkawt BCA-in final an thleng

Mizoram Super League season 7 final khel turin Zarkawt BCA an tling. Champion lai hian Play In game 2-ah Khatla TBL chu 86-77 in an hneh a, inkhelh nawn ngai loin tunah chuan nomawi an inchuhpui tur an nghak thei ta.

Nizan khan Tuikual South leh Mission Veng Hotshots an inhmachhawn a, a chak zawk leh Khatla TBL ten 'play in' an la khel leh dawn. TBL tan final lut turin vawi khat chak a la tawk dawn a, an khingpui tur tan erawh vawi hnih chak a ngai ang.

Tualchhung basketball inelna lian berah Zarkawt BCA hi an vawk-lallen a ni deuh ber mai. A zawnin vawi thum an champion a ni saltiah lo, inelna an thunun hneh thei hle - kuminah pawh anmahni khingzo an awm rih lo.

League round-ah an chungnung ber. Play In an game hmasa berah pawh Lalrina Renthlei leh a ṭhiante an la ṭha fal chhunzawm. Point 32 neitu Joseph Allen chu mimala thawhhlawk ni mah se, tualchhung player ṭhate bawk chu an innghahna an ni.

TBL tan pawh beisei a la bo bik lo. K. Lalthianghlima'n point 20 a neih bakah rebound vawi 12 a la thei a, play in chinah ani chiah hi Mizo zinga double-double nei thei a ni, an vanneih ṭum ni se team ṭha BCA hneh turin theihna an nei ve bawk.

Amaherawhchu, coach Lalruatfela enkawl BCA hneh tur chuan hmasawn an la ngai. Hei bakah vawi hnih champion tawh TBL hian Tuikual South emaw Hotshots paltlang dan tur an ngaihtuah hmasak leh rih a ngai dawn.