Inkhelh dan hautak All Mizoram Inter Village Football
LBS Suzuki All Mizoram Inter Village Football Tournament 2022 chu ground panga Lammual, RG Stadium, MZU Ground, MFA Ground (Sairang Dinthar) leh Lengpui MSC-ah te khelh a ni. Inelna buatsaihtu MFA chuan khelh hmabak fixtures a tichhuak a, tunkar chhungin second round khelh hmabak khelh zawh a nih dawn bakah round of 64, round of 32 leh round of 16 khelh zawh vek a ni dawn.
Fixtures chu
Inelnaah hian team 204 an tel a, group paliah ṭhen an ni. Group A-in Lammual an chang a, group B-in RG Stadium, group C-in MFA Ground (Sairang Dinthar) leh group D-in Lengpui MSC an chang. MZU ground-ah group A leh B inkhel siamremna dah a ni leh bawk. A tawi zawng chuan group A leh B an vannei a, round hmasa pahnih Aizawl khaw chhungah an khel tihna a ni.
MFA lamin inelna thlengtu Lengpui VC team chungah duhsakna an lantir a, group C-ah awmin MFA Ground chang mah se second round chu an khelmualah a khelhtir thung.
Third round aṭangin MFA chuan fixtures a ennawn a, group A-a awm team-te chu Lammual aṭangin MFA Ground leh Lengpuiah sawn an ni. Group B erawhin MFA duhsakna dawng chhunzawmin RG Stadium leh Lammual an la chang.
Group C te pawh Sairang Dinthar aṭangin Lammuala chho an awm a, vanduai erawh an la awm. A vanduai deuh ho hi Sairang Dinthar-ah an la inkhel chhunzawm dawn. Chutiang bawkin group D-ah team chanve Lammualah an chhoh laiin group D team chanve dang Lengpuiah an la chambang.
Senso hautak chu
Inter Village Football-a tel hi a hautak sa tawh hrim hrim a, a bik takin thingtlang khua tan a hautak lehzual. Inelna hmachhawn turin inhlawh chawpin an rawn tel a, Aizawl zin tur ringawt pawhin sum ṭhahnem tak an seng tawh. Sairang Dinthar leh Lengpui chang fuh erawh harsatna belhchhahin a awm a, an thlenna Aizawl aṭanga inkhelhna hmun pan turin sum ṭhahnem tak an seng leh bawk.
Inelna an hmachhawn tawh miau avangin inhnuhdawh a rem tawh lo a, bialtu MLA leh khawchhuak awm thei deuhte chu a tuartu an ni. Kalna man chauh a ni lo a, ei leh in man tur a ngai leh bawk. Chutihrualin inelna hi Aizawl khaw pawna buatsaih a nih pawhin uluk zawka fixtures siam a nih chuan team ṭhenkhat harsatna hi sem rual theih niin a lang.
Result a tidanglam
Lengpui leh Sairang khawtlang an inhawng a, Mizo tlawmngaihna nen mikhual ṭha takin an thleng. Chutihrualin team zawng zawng tan riah luh vek a rem lo a, hemi a nih avang hian Aizawl aṭangin inelna neihna hmun pan a ngai.
Match khelh hmain darkar hnihte lirtheia chuan a ngai a, player-te harsatna belhchhah turin Aizawl aiin Lengpui leh Sairang a lum zawk. Khelmual chhehvel boruak leh motor chuan chauh vangin inkhel result hi a danglam thei hial ang.
Hei bakah hian inelna hi talent zawnna tur a ni a, motor chuan harsatna neih avanga theihna anga khel chhuak ta lo - talent zawh hmuh tak loh pawh an awm nual thei bawk. Hei chauh hi a ni lo, football scout tan pawh khelmual inkar hlat tak panga hi en vek sen a ni lo.
A hautak dawn chauh
Tunkar hian round pali - second round, round of 64, round of 32 leh round of 16 khelh zawh tur a ni a, ṭhenkhat tan chuan kar khat chhungin match li khelh a ngai dawn. Chutihrualin match li khel tur team chu an tam kher lo ang a, chutihrualin round of 16 khel pha chin chuan match thum an khel vek dawn.
Round of 16 chin hi Lammual leh RG Stadium-ah khelh a ni dawn a, team dinhmun erawh a inang hlawm dawn lo. Team ṭhenkhat chu round of 16 khelh hmain Lengpui leh Sairang Dintharah ṭum hnih an zin dawn a, ngaiawh hman a har ang.
Amaherawhchu inelnaah chuan vanduai leh vannei an awm ṭhin a, a tawpah erawh champion chauh an hre zui ṭhin - chhuanlam neih a thiang lo.