Mizoram State Shooting Championship zo

Mizoram Rifle Association buatsaiha neih Mizoram State Shooting Championship chu nimin khan neih zawh a ni ta a, mipa inelnaah Fabian Lalrinliana chuan kap thiam berin gold medal a hlawh chhuak.

MRA Shooting Gallery, Mualpui, Aizawla neih inelnaah hian 10m Air Rifle/Air Pistol hmangin inelna hi neih a ni a, Aizawl tlangval Fabian hian point 338 hmuin gold a hlawh chhuak a, Siaha aṭanga inelna hmachhawntu Reuben F. Lalhruaizela (371 points) leh Mizoram Police aiawhtu Zoliansanga (368) ten an dawt.

Junior Men (kum 19-21) inelnaah Malsawmdawngpuia (314) chu pakhatna a ni a, Joshua Vanlalpekhlua (313) leh Lalhlimpuia Kawlni (308) te nen an inthlauhna a tam lo hle.

Youth (kum 16-19) inelnaah Champhai rawlthar Peter (305) aia kap thiam zawk an awm lo a, Joseph Lalchhuanmawia (275) leh Lalremmawia Chhangte (262) ten an dawt a ni.

Master Men inelnaah Serchhip aṭangin Kaste Romalsawma (309) chuan gold medal a la a, hmeichhe inelnaah Lalhlimpuii chuan gold medal a la ve bawk.

Junior women-ah C. Ramdinmawii (341), youth women-ah Grace Lalchhanhimi (352) leh sub-youth women-ah R. Lalremtluangi (363) te chu ti ṭha ber an ni a; Peep Sight Air Rifle (ISSF) Championship 10m Men-ah Erast Lalhruaimawia (572) chu a thiam ber niin Women-ah Lallawmzuali'n (573) gold a la bawk.