Inter Village Football-ah 'GOAL 116' a lut

LBS Suzuki All Mizoram Inter Village Football Tournament 2022-ah nimin khan khelmual pangaah match 19 khelh niin goal 116 a lut. Tun ṭum inelnaa ni khata goal luh tam ber ṭum a ni a, chanchin ngaihnawm tak tak hriat tur a awm bawk.

Lammualah Kolasib Jt VC, Diakkawnin Farkawn lamah goal hnih khung hmasa mah se Farkawn hian second half-ah 3-2 in an lehthal. Hualngohmun tan Vanlalthanga a rawn langsar a, Lungtan 4-1 a an hneh ṭumin hattrick a siam.

MPL club FC Venghnuai coach Rindika Hmar kaihhruaina hnuaiah Salem Vengin 11-0 ngawtin Serkhan an hneh a, team ṭha zinga mi an ni tih a chiang. Mualphengin 2004 CYMA Football champion Ramthar 2-1 in an lehthal bawk.

Parvatuiin inelna hmachhawn tura Aizawl an pan dan hi chanchin ngaihnawm a ni tawh hrim hrim a, ruahsur vanga kawng a mumal loh avangin thui tak kein an kal. Nimin khan Parvatui an inlan a, Mautlang South 9-3 in sawp. Rawlthar duhawm PC Vanlalmalsawma'n goal riat ngawt a khung. PC-a hi Tata Trusts COE-a awm ṭhin a ni a, Mizoram Under 15 League hnuhnung ber 2019-ah khan best midfielder niin tunah hian Kerala United tan a khel mek. India Under 18 atan pawh koh a ni a, a kut a tliah avangin a zawm thei ta lo.

Republic Vengthlangin tun inelnaa match khata goal khung tam ber record an siam a, nimin khan RG Stadium-ah Bawngva 13-1 in an sawp. Isaac Vanlalnunpuia'n hattrick a siam a, player 10 dangin goal khat ṭheuh an khung bawk.

Lengpuiah coach Chawngthansanga enkawl Pangzawl-in Hunthar 4-0 in an hneh. India rama footballer manto ber Lalengmawia Ralte (Apuia) khelhna Vaivakawnin Aizawl FC academy chhuak Swapana hmangin Kawrtethawveng 1-0 in an hneh hram.

Champhai Inter Village-a pahnihna Zokhawtharin Aibawk 6-4 in an hneh. West Phaileng leh Kawnpui inkhelah goal sarih lutin a tawpah West Phaileng 4-3 in an vannei. Keifangin Khatla East 6-2 ngawtin an hneh a, Selingin North Khawlek 9-0 in an sawp bawk.