Team ṭha Ramhlun South, Hnahthial leh Khawzawl Vengthar te inlan dawn

LBS Suzuki All Mizoram Inter Village Football Tournament 2022-ah vawiin hian inkhel pariat chiah a awm dawn a, amaehrawhchu team ṭha tura ngaih Ramhlun South, Hnahthial leh Khawzawl Vengthar te inlan dawn avangin en a châkawm hlawm hle.

Vawiin hian MFA Ground (Sairang) leh Lengpui SMC-ah chauh inkhel a awm dawn. Sairangah Aizawl khaw pawn aṭanga team ṭha zinga mi Hnahthial Joint VC te an inlan ang. Hnahthial hi Mizo footballer zinga thleng sang ber Jeje Lalpekhlua te khua a ni a, footballer ṭha an kawl tam bakah artificial turf an neih tawh bawk avangin an ṭha tura ngaih an ni.

Hnahthial hi Republic Veng Community Hall-ah an inkulh a, Pune FC tana khel tawh Jakob Vanlalhlimpuia leh Aizawl FC midfielder Joseph Vanlalhruaia bakah player hmabak nei êng tak takte an enkawl - Bungkawn Vengthar lakah fiahin an awm ang.

Ramhlun South hian sulhnu ṭha an nei a, Malsawmfela te unau ringawt pawh innghahna tham an tling. Samson Ramengmawia enkawlna hnuaiah beiseina sang tak an nei a, chawhnu dar 1:00 hian Jt VC, Vairengte nen an inkhel ang.

Khawzawl Vengthar-ah Aizawl FC defender Lalṭhakima leh Chhinga Veng tan te pawh khel tawh Vanlallawma te an awm a, Khawzawla Aizawl Academy awm an ṭhatpui tura ngaih an ni bawk. Amaherawhchu an khingpui tur Muthi hi hneh awlsam an ni lo ang.