Zonet leh MWA inrem; Mizo inchai title fight nei dawn

Mizoram infiamna khawvela ngaihhlut hlawh ber pawla chhal ngam Mizo inchai title fight chu November-ah neih a ni dawn a, he fight neih tur atan hian Zonet Cable TV leh Mizoram Wrestling Association te chuan nimin khan Aijal Club-ah thawhhona thuthlung an ziak.

Zonet aiawhin director LV Lalthantluanga chuan a hming a ziak a, MWA aiawhin Mizo inchai title fight 2022 organising committee chairman Ngurthansanga'n a hming a ziak thung - title fight hi November 2-4 inkarah neih tura ruahmanna siam a ni a, a hmun tur erawh tihchian a la ni lo thung.

Mipui nghahhlelh ber tia sawi ngam Palian inchai title fight-ah Upper Republic tlangval Lalsangliana leh Salem Veng tlangval Lalnunfela an in fight dawn a, wrestler pahnihin an inhuphurh loh thu an sawi ve ve avangin fight en a châkawm tawh takzet.

Excise & Narcotics department-a thawk lai Sangliana'n, "Hei hi chu ka ta a ni a, kawl hlen ka tum," tiin a belt chungchang a sawi a, Salem Veng tlangval Fela chuan, "Ka kawl hawhtir a, ka laklet a hun tawh," a ti ve thung.

Inremna chu
Zonet leh MWA inremna ang chuan Mizo inchai title fight 2022 organising committee chuan kawng engkimah hma lain, buaipui tur ṭul zawng zawng an buaipui ang.

Title fight hi pay-per-view a pekchhuah tur a ni dawn a, PPV aṭanga sum hmuh hi MWA-in 90% an chang a, Zonet-in 10% chauh an chang dawn thung! Ticket hralhchhuahna aṭanga sum hmuh zawng zawng pawh MWA chanpual tur a ni.

Kumin title fight-ah hian wrestler-te hlawh chu ṭum dang aia sanga pek tura ruahmanna siam a ni a, hlawh pawh hi Zonet-in an tum vek ang - chutihrual chuan sponsor aṭanga sum hmuh erawh Zonet chan tur a ni.

MWA lam hian sum thehchhuahna tur pawh an nei ve dawn tho - technical official-te hlawh chu an tum tur a ni a, Mizo inchai title fight-a technical kaihhnawih zawng zawng an buaipui bawk ang.

Mizote tan
Zonet director LV Lalthantluanga chuan, "Infiamna hrang hrang kan lo buaipui tawh a, football, basketball, futsal leh boxing thlengin kan phak tawkah tha kan lo thawh ve tawh ṭhin.

"Zonet din chhan chu he hnam chawikan hi a ni a, kan phak tawk kan ti ve zel ang. Mizo inchai pawh hi kan hnam ta, kan traditional game a ni a, he infiamna hi Mizoten kan chawimawi a ṭul a, national thlenga kan hming timawi thei a ni," a ti.

Mizo inchai title fight 2022 organising committee chairman Ngurthansanga chuan, "Kan beisei phak bakin kan tan Zonet an inhawng a, wrestler-te hlawh piah lama PPV share 90% min chantirte hi a mak zawk a ni," tiin Zonet chunga a lawm thu a sawi a, "Engkim hi Pathian vang a ni," a ti bawk.

Ngurthansanga chuan, "Kan faten eng infiamna pawh an tuipui a nih chuan, Mizo nu leh pate hian tuipui i zir ang u - a hnuah kan duh loh zawk ruihhlo vangin an buai leh ṭhin a, ruihhloin a tihbuai kan nei a nih chuan kan hnenah lo hruai rawh u, kan pui ang che u," tiin Mizo ṭhalai zinga hluar tak ruihhlo chu infiamna khawvel hmanga hneh theih a nih thu a sawi.

Fela a inpeih
Kum 31 mi Fela hian kum 2011 khan palian champion lai, Kolasib tlangval Lalhmingmawia Fanai (L) chu hnehin palian champion a ni a, Mizoramin Salem Veng tlangval chak leh tharum ngahzia a hre ṭan.

Mizoram Police (traffic unit) a thawk lai Fela hian Amawitea fight tur zawnnaah title fight-a a hmachhawn tur Sangliana hi a lo hneh tawh a, mahse, kum 2014 khan Sangliana hian Fela hi hneh letin title a hlawh chhuak.

Kum 31 mi Fela chuan, "Kum 2015 aṭang khan ka title hlawh let ngei tumin ka bei tawh a, mahse, a kar lakah harsatnate kan tawk a, tin Covid-19 lengin min tibuai tel bawk a, kan duh hun takah fight a neih theih loh zawk.

"Ka manager Reuben Lalrinsanga leh personal trainer Daniel Sailo ten a bik takin ni tin training min neihpui a, ka inbuatsaihna hi a ṭha tawk - a hma nen chuan a dang tawh khawp ang," tiin Vanglaini a hrilh a, a title hloh tawh chu Sangliana hnen aṭanga neih let ngei a tum.

Sangliana a sang
Kum 2014-a title a hlawhchhuah hnuah Sangliana'n a kawnghren kawl lai chuhpuitu tur a nei lo a, kum 2022 a herchhuah meuh chuan a kawnghren a chhuhsak tawh Fela bawk a lo lang.

Kum 31 mi wrestler Sangliana chuan, "Duhthusama inbuatsaih turin hun ka la nei tam tawk lo a, mahse, ka duh ang takin ka inbuatsaih thei thuai ang, ka title humhim turin huphurh ka nei lo," tiin Vanglaini a hrilh a, a kawnghren kawl chhunzawm ngei a inring.

Fela nena an intawn hmasak berah Sangliana a tlawm a, mahse, 2014-ah Salem Veng tlangval hi a hneh let. Sangliana chuan, "Kan intawn hmasak kha chuan Fela hi a lian zawk a, kan buk pawh a inrih hleih hle.

"Mahse, hun a kal a, kan result chu in hria. Tunah pawh hian huphurhna ka nei lo a, he kawnghren hi kawl hlen ngei ka tum a ni," tiin Vanglaini a hrilh a, Mizo palian champion ni chunga Krismas hman ngei a tum e!

Mizo inchai title fight a inchai turte

Nute
Lalbiakdiki, Vs Lalvenhimi,
Serchhip Bethlehem Veng

Nulaihawl
Elizabeth Rohlupuii, Vs Zodinpuii,
Mel riat Lunglei

Nulian
Hmangaihsangi, Vs Lalsiamthari,
Dilkhan(Saitual) East Lungdar

Pate
B. Lalawmpuia, Vs Lalchhanhima,
Thenzawl Saitual 39AR ARTC&S

Palaihawl
Remruatpuia, Vs Lalmalsawma,
Saitual Kolasib

Palian
Lalsangliana, Vs Lalnunfela,
Excise & Narcotics Mizoram Police (Traffic Unit)