Meghalaya: Hri kaite contact chhui tur team pakua din

Meghalaya health department chuan Covid-19 kaiten an contact-te chhui tur bik team pakua, member 36 awmna a din. Heng team-te hian nimin aṭang khan contact tracing an nei nghal a ni. 

East Khasi Hills district bikah chuan hri kai an pun belh zel avang leh, hri kaite contact chhuina tur hian nimin zing dar 6 aṭanga Nilaini zing dar 6 thleng curfew puan a ni. State chhunga hri kai hmuh chhuah tawh hi mi 295 an tling tawh a, an zinga mi 45 chu enkawl dam ni tawhin enkawl mek mi 248 an la awm.  Chief minister Conrad K Sangma chuan an state-a hri kai mek awm zinga Border Security Force (BSF) mi leh sa 178 an tel tih a sawi. 

NEIGRIHMS hospital chu BSF dam lo awm pakhatin Covid-19 a kai tih hmuh chhuah a nih avangin pawn lam mi tan tlawhpawh theih lohin khar nghal a ni a, hemi hnu hian damdawiina awm leh thawkte test neihsak niin Pathianni khan mi pasarihin hri an kai tih hmuh chhuah a ni. Hri kai hmuh tharte chu staff nurse pakhat, dam lo pathum leh dam lo awmpuitu pathum an nih thu director Dr P Bhattacharya chua a sawi.

Ri Bhoi Deputy Commissioner RM Kurbah chuan an district chhunga Assam ramri biala lockdown a puan chu nimin zing dar 6 aṭang khan July 20, zing dar 6 thleng atan a pawtsei. 

Assam-ah hri kai an pun chak avangin state ramri bialah hian Meghalaya sorkar chuan lockdown hi a puang a, state ramri kaltlanga public leh private motor tlan khap nin, bazar leh sumdawnna hmunte khar a ni a, mi panga aia tam awmkhawm khap a ni bawk. Assam-a hri leng hian ziaawm lam a la pan theih loh avang leh, nitin hri kai an pun belh reng avangin ramria inkharkhipna kalpui pawh hi chhunzawm a ni  leh ta a ni. 

Khasi Students Union (KSU) chuan Shella hmuna BSF awmte chu Covid norms palzutah puhin, an awmna hmun tualchhung mite din­hmun hlauthawnawma dahah an puh. 

Pathianni khan thuchhuah siamin, KSU Shella unit chuan BSF mi leh sa zingah hri kai eng emaw zat hmuh an nih hnuah pawh, Inrinni khan BSF sipaite hi Shella bazar-ah mask vuah lo leh social distancing dan pawh zawm loin zalen takin an tei vel tih a sawi. 

Sorkarin hri darh tur venna atana kaihhruaina a siamte zawm loin, an duh anga teihawi kualah BSF chu an puh a, hemi chungchangah hian hma la turin district thuneitute pawh an phut tih an sawi bawk.