Melbourne-ah Formula 1 tlan zel dawn

Formula 1 chuan Australian Grand Prix nen inremna an siam a, kum 1996 aṭanga an tlan tawhna Melbourne khawpuiah hian kum 2035 thleng chu car intlansiakna sang ber hi an tlan chhunzawm zel ang.

Inremna awm hmasa kha kum 2025 thleng daih a ni a, tunah chuan kum 10 dang atan inremna hi an ziah belh. Ruahman anga a kaltluang a nih chuan, a hmun ngaiah kum 40 deuh thawh chu Australian GP an tlan dawn tihna a ni.

F1 president leh chief executive officer ni bawk Stefano Domenicali chuan, "Melbourne hi mipuiin nuam an ti, team leh driver tan pawh hmuh nuam berte zinga mi a ni a, kuminah pawh intlansiak hlawhtling tak kan nei theih a nih kha.

"Hun lo kal zel turah pawh thawhhona ṭha tak kan nei chhunzawm ngei ang," a ti. Albert Park track awmna state Victoria sports minister Martin Pakula pawhin tun hma zawng aia lian leh ropui zawka F1 neih chhunzawm an duh thu a sawi ve bawk.

Hripui leng vangin season thum chhung chu Australian GP an tlan thei lo, kuminah erawh Albert Park-ah mipui 419,000 tehmeuh an fuan khawm. Australia ramah chuan hripui nasa taka a len hnuah infiamna huanga mipui fuankhawm hnem ber a ni hial.

F1 season kal laiah hian intlansiak 22 a awm dawn, heng zingah hian pariat an tlan tawh. Driver champion lai Max Verstappen chuan hma a hruai mek, point 150 a hmu tawh. A hnungah amah ang bawka Red Bull car khalhtu Sergio Perez (129 points) a awm mek bawk.