Mayweather khumtu Menayothin a chawl leh lo!

Floyd Mayweather record khum a, vawi 54 inhnek a hmachhawna tlawm miah lo record siam thei Wanheng Menayothin chuan a chawlh thu puang zet mah se a thutlukna hi a sut leh a, a chawl leh lo!

Mayweather-a'n inhnek a hmachhawn 50-ah hnehna chang vekin hetiang record nei thei dang hi an awm loa ngaih ṭhin a ni. Mahse, tun hnai khan Menayothin-a'n boxing a chawlhsan thu a puang a, ngaihven a hlawh hluai. 

Thai boxer record an en a, vawi 54 ngawt a lo chak reng - Mayweather record chu khawthlang media-ten an theh lar mang lohin a lo khum tawh reng a lo ni a, ngaihven a hlawh thar lehzual. 

Menayothin hian hetiang taka ngaihven a hlawh leh tak avang hian boxing ring chhuahsan mai a ui niin a lang a, Asian Boxing Council chuan Asian boxer ropui hi a chawlh leh loh thu an puang zui. 

Kum 34 mi Wanheng Menayothin hi Thailand lam chhuak boxer a ni a, vawi 54 inhnek a hmachhawna a chak veknaah hian a khingpuite chu vawi 18 zet a knockout thei - a theuneu lo hle. 

Fight-a hmachhawnna hi WBC minimumweight a ni a, Mizo boxer NT Biakkima'n WBC Asia title beiseia a inbuatsaih mekna weight hi tuna Menayothin-a inlanna weight hi a ni. 

5ft 2in leka sang a ni a, ‘Dwarf Giant’ (Mite Palian) tih hminglem pek niin Thailand-ah chuan hriat a hlawh hle. Kum 2014 khan Mexican boxer ṭha Oswaldo Novoa hnehin WBC title a kawl ṭan.

Thai boxer ṭha mi hian Philippines, South Korea, Japan, Mexico, Australia, Panama leh South Africa boxer-te hmachhawn tawhin vawi 12 zet a title kawl lai hi a humhim tawh. 

Menayothin-a'n chawlh a puan hnua a chawlh leh loh thu a sawi hi intihlar tumna ang pawha ngaih theih a ni a, tunah chuan sum tamna US lama inhnek an sawi ri ta. 

Kum 34 mi boxer hian boxer ropui Oscar De La Hoya hnuaia Golden Boy Promotions-ah contract a nei a, kumin April khan a vawi khat nana USA-a fight nei tura ruahmanna kalpui a ni. 

Mahse, he fight hi an tum angin a thleng thei ta lo a, a chawlh leh tak lohah chuan US bawk an sawi ri leh ta. Golden Boy president Eric Gomez chuan, "Khawvela fighter ṭha ber pawl a ni," tiin a lo sawi hial tawh. 

Minimumweight division-a boxer tam zawk hi Central America leh Asia lam mi an ni a, Thailand pawnah Menayothin hian inhnek a la hmachhawn ngai lo.

Menayothin-a'n boxing a chawlhsan leh loh thu a puan hnu lawkah chotu an lo lang ve nghal zat a, WBO mini-flyweight world champion Wilfredo Mendez chuan Thai boxer hi a lo cho nghal vat. 

Hetihlai hian WBC hnuaia Asian Boxing Council chuan Menayothin hian September-ah a kawnghren kawl lai humhim tuma inhnek a hmachhawn leh tur thu an sawi a, Mendez nen hian inhnek chiah se ngaihven a hlawh hle ang. 

Menayothin hi April-a US-a inhnek tura tih a nih khan Marco John Rementizo nen inhmachhawn tura tih an ni a, Rementizo nen bawk hian inhnek tura an ti leh ta zawk a nih pawhin a mak lo ang. 

Engpawh nise, Thai boxer ngaihven hlawh thar hi record ṭha tak nen khawvel hriat hlawh loin rei tak a lo awm tawh a, a inhnek leh hunah erawh boxing khawvel nghawrnghing khawp a ni tawh dawn thung niin 

a lang.