LBS Suzuki All Mizoram Inter Village Football June 17 zanah Khuhhawnna

Mizorama football inelna lian, LBS Suzuki All Mizoram Inter Village Football Tournament-ah team 205-in a hun takah entry fee an pe hman a, June 17 zan hian Kick Off neih a ni dawn a, inkhel tur pawh fel nghal a ni ang.

Kick Off zanah hian team tin aiawh mi pakhat ṭheuh Chanmari YMA Hall-ah kal tur a ni a, zan dar 8:00-a ṭan tur a ni - Zonet TV leh an Youtube channel-ah live-a pek chhuah a ni ang.

Team tel zat hi 204 tih a nih hnuah entry fee a hun taka pe ziah luh hmaih pakhat a lo awm a, 205 an ni ta - hun tiam a pelh hnuah entry fee pek tum ṭhahnem tak la awm mah se a pawm theih a ni tawh lo.

District 11 an tel kim dawn a, squad list thehluh hun atan June 16 chawhnu dar 3 thleng hun pek a ni.

MFA buatsaih inkhel runpui hi khelmual pali - Lammual, RG Stadium, MFA Ground (Sairang Dinthar) leh Lengpuiah khelh tura ruahman a ni a; team tel an ṭhathnem avangin round hmasa lam hi chu Aizawl leh a chhehvela artificial turf awmna khelmual hman a ngai dawn a ni.

MFA thuchhuah tarlan danin MFA leh DFA lamin club inelna a kalpui chhoh leh hnaih tawh avang leh registration hun hawn a nih dawn hnaih avangin inter village football hi a hma theia zawh tum a ni a, hei vang hian khelmual pali hman a ni ang.