Wimbledon khel tur Serena

Serena Williams chuan Wimbledon a khel dawn, hun rei tak inkhel thei loa awm mek Serena hi duhsak takin wildcard pek a ni a, grass court inelna lianin an duhsak ang ngeiin a pawm.

Season hmasa Wimbledon-ah Serena hi a inhliam, a hnu lamah tournament a la hmachhawn leh miah lo. Tun dinhmunah chuan Serena hi world number 1223 a ni daih! A ranking pangngai chuan Grand Slam a khel phak lo chiang hle.

Mahse, major tournament buatsaihtute hian an duhsak zawng hnenah wildcard an pe ṭhin, qualifying pawh khelh hah ngai loin hmeichhe player paruk hnenah wildcard hi an pe chhuak a, mipa player pek an nei bawk.

American star hian major title 23 tehmeuh a nei tawh a, champion hnem ber Margaret Court (24 titles) a tluk teuh ṭhin hle. Mahse, tun hnaiah a vannei tawk lo a, final-ah a chak lo leh tlat ṭhin, hliam a neih bawk avangin record thar siam chu a harsa tawh mai thei.

Wimbledon inbuatsaih nan Eastbourne-ah Serena hi a inlan hmasa dawn, tun kar tawp aṭanga khelh tur tournament-ah hian singles ni loin doubles huangah a khel thung ang.

Mipa player pasarih hnenah wildcard pek a ni bawk. An zingah hian Grand Slam vawi thum champion tawh Stan Wawrinka pawh a tel. Swiss star hi hliam vangin tun hnaiah a inkhel tam tawk lo, a vanglai a pelh tawh bawk avangin thleng sang tur erawh chuan beisei ngam a har.

Grass court inelna lian ber Wimbledon hi June 27 aṭangin All England Club-ah khelh a ni ang.