BCA ngamtu Tuikual South

Mizoram Super League season 7-ah a vawi khat nan Zarkawt BCA an tlawm. Champion lai BCA hi Tuikual South chuan 89-68 in an hneh a, an player ṭha Darrell Bowie chuan point 45 zet a nei.

Thawhlehni zan R. Dengṭhuama Indoor Stadium, Mualpuia inkhelah Tuikual leh BCA an inkhel tawk viau, quarter hnuhnung pahniha chungnung zawk Phengphehlep chu a tawpah an sang ta zawk.

6ft 8in a sang Bowe-a'n point 45 a neih bakah assist vawi 16 a la thei a, tun season inelna neih tawh chinah match khat chhunga mimal che na ber a la ni hial ang, an khingpui tur dang tan hmachhawn a châkawm lo khawp ang.

A zawna vawi thum champion thei BCA tan inenfiahna tur a ni ang. Lalrina Renthlei leh Matthew Remtluanga Sailo te awmna team hi chak lo thei an ni tih a lang ta a, nomawi humhim an duh a nih chuan thawh leh nghal a fuhin a rinawm.

Zanin dar 8:00 hian a hmun ngaiah inkhel a awm leh dawn. Beisei anga season hmang lo Chanmari Vikings leh Chawnpui an inhmachhawn ang, team pahnih hian MSL 7-ah chak an la nei lo, a tu emaw zawk chu a vawi khat nan an chak dawn.