Roma-ah Matic a kal

Nemanja Matic chuan Manchester United tana contract a hman zawh hnuin AS Roma a zawm fel. Italian club tan hian season khat daih contract a ziak, amah hrechiangtu Jose Mourinho nen an thawkdun dawn.

Mourinho-a'n Chelsea a enkawl laiin Serbian midfielder hi a lalut a, chumi hnuah Man United a enkawl lai pawhin Old Trafford-ah a lei nawn, tunah a vawi thum nan an inhrawn dawn a ni.

AS Roma coach Mourinho chuan, "Player ṭha danglam bik a ni, eng inkhelah pawh chak a duh, chak loh a ngaithei lo tih chu in hmu fo ngei ang. League nomawi kan chawi a nih pawhin, season tharah champion leh nghal zel a duh," tiin a player thar chungchang a sawi.

Chelsea tana a khelh lai khan Premier League nomawi vawi hnih a chawi a, FA Cup-ah a champion bawk. Man United-ah erawh FA Cup leh Europa League final khel mah se a chak lo lamah an ṭang ve ve thung.

Roma general manager Tiago Pinto chuan, "Kan club a rawn zawm duh hi kan lawm. A quality chauh hi a ni lo, a tawnhriat tam tak hi kan tan a ṭangkai dawn, a rilru put hmang hi kan duhzawng a ni bawk," tiin a sawi.