England an mualpho; Germany-in Italy sawp

September thla hma chuan UEFA Nations League khelh chhunzawm a ni tawh dawn rih lo - England leh Italy-in hnu an khar dan erawh mualphona tawpkhawk a ni a, insiamṭhat vat an mamawh.

England chuan season thar ṭan leh hmaa Nations League-a an match hnuhnung berah Hungary an ngam lo a, anmahni mualah ngei 4-0 in an mualpho - Hungary tan Roland Sallai chuan goal hnih khungin Zsolt Nagy leh Daniel Gazdag te chuan goal khat ve ve an khung bawk.

Germany-in 5-2 in Italy an sawp a, Joshua Kimmich, Ilkay Gundogan (penalty), Thomas Muller leh Timo Werner (2 goals) ten Die Mannschaft tan goal an khung a, Italy tana Wilfried Gnonto leh Alessandro Bastoni goal khung chu mualpho zualpui khuhna chauh a ni.

Netherlands chuan 3-2 in Wales an hneh a, team pahnih hian injury time-ah goal an khung ve ve - match li an khelha tlawm nei lo Netherlands tan Noa Lang, Cody Gakpo leh Memphis Depay ten goal khat ṭheuh an khung a, Wales tana Brennan Johnson leh Gareth Bale goal khungin awmzia a nei phak lo.

Sakeibaknei a zuai!
England hming lem chu Three Lions a ni a, Hungary lakah an khelh dan erawh sakeibaknei zakzum ang mai an ni - inkhel a zawh meuh chuan England fan-ten an team an au el a, hmanni lawkah "Runah a lawi dawn e," tia European champion nih beiseia zaite au thawm a danglam ta.

Hungary tan Roland Sallai chuan minute 16-na lekah finishing tawih zetin goal hmahruai a khung a, Bundesliga club SC Freiburg midfielder hian minute 70-naah a chhunzawm leh bawk - Manchester City nena sawizawm hlawh mek Kalvin Phillips chetsual vang a ni.

Hungary goal khung kar hla mah se hun tawp lamah an vul a, England an zak! Minute 80-naah Hungarian club Puskas Akademia FC tana khel Zsolt Nagy chuan a belhchhah a, hun tawp nan minute khat chiah a awm tawh tihah MLS club Philadelphia Union midfielder Gazdag chuan a chhunzawm ve leh bawk.

Nations League-a match li an khelh tawhah England an chak zo lo vek a, kum 2014 hnua match li a zawna an chak zawh lohna hmasa ber a ni - Gareth Southgate duh lohna thawm a ri ring ṭan.

A chiang e
Kum 1957 hnua Italy laka goal nga khung hmasa ber chu Germany an ni a, an chak chiang hle - an mikhual Italy hi 5-2 in an sawp a, kum tawp World Cup-in a hmuah mek Germany tan result lawmawm a tling.

Die Mannschaft (Germany sawina) tan Joshua Kimmich chuan minute 10-na lekah goal hmahruai a khung a, first half hun pek belh minute linaah Ilkay Gundogan chuan penalty hmangin a belhchhah bawk.

Italy an insiamṭha hman lo - second half ṭan aṭanga minute rukna lekah Muller-a'n a belhchhah a, Chelsea striker Werner chuan goal khung a la thiam reng tih pholangin goal hnih a khung bawk.

Roberto Mancini nauten mualpho lutukna tur dal turin goal an khung ve a, kum 18 mi Gnonto chuan Italy tana goal khung naupang ber ni turin si phurh a sut ṭhen a, hun pek belh minute linaah Bastoni chuan a khung ve leh bawk - mahse, scoreline timawitu bak an chang phak lo.

Inkhel hmuhnawm
Wales-in hun pek belh minute hnihnaah Gareth Bale-a penalty hmangin si phurh an sut a, golf khel anga a goal khung lawmtu Bale-a'n Netherlands lakah point an hlawh chhuak dawn emaw a ti hman.

Mahse, Netherlands-in ngaihdan dang an nei - minute khat pawh a liam hmain Memphis Depay hmangin goal an khung ve leh a, Louis van Gaal-a nauten 3-2 in hnehna an chang ta daih.

Netherlands hian Club Brugge winger Noa Lang leh PSV Eindhoven winger Cody Gakpo hmangin minute 23 chhung lekin goal hnih an khung hman a, Wales tan Nottingham Forest winger Brennan Johnson chuan minute 26-naah si phurh a sut ṭhen.

Goal dang a lut lo reng a, Wales-in injury time-ah penalty an hmu - an vanneihpui mai dawna a lan hnuah Bale-a penalty chhuih luh chu Depay-a'n a sut lehnghal a, Nations League match li an khelhah Netherlands an tlawm miah lo! Vawi thum an chak a, vawi khat draw an nei.