US Open-ah Russian player

Grand Slam pali zinga a hnuhnung ber US Open-ah Russian player an inlan thei dawn. United States Tennis Association (USTA) chuan Russian player chungchanga an thutlukna hi an siam fel tawh a ni.

Russia leh Ukraine an indo a, buaina chhuah chhan lian zawk Russia hi kawng hrang hranga hrek an ni. International Tennis Federation (ITF) chuan ram leh ram inelna huanga an tel an phal lo mek.

Wimbledon-ah pawh Russia leh Belarus player chu an inlan thei dawn lo. Mahse, French Open ang bawkin US Open chuan Russian player a thliar hrang dawn lo, an ram hming chhawm thei lo mah se mimal ang chuan an tel thei dawn.

USTA chuan thuchhuah siamin, "Grand Slam dang pathum, ITF, ATP leh WTA ang bawkin USTA chuan Russia leh Ukraine buaina hi ṭha a ti lo, buaina siamtute kan dem takzet. Ram leh ram inelna huangah chuan hrem chhunzawm pawh a ṭha kan ti.

"Amaherawhchu, player mal chungah erawh thununna lekkawh a ngai kan ti lo. An ranking leh thiamnain a tlin a nih phawt chuan US Open an khel thei ang, an ram flag hnuaiah inkhel thei lo mah se neutral athlete an ni mai ang," an ti.

Season hmasa US Open final-ah khan Daniil Medvedev chuan Novak Djokovic a hneh. Russian tlangval hian a nomawi humhim turin New York khawpui a pan thei dawn tihna a ni a, a tan chanchin lawmawm bik a ni ngei ang.