World Cup khel tur a hriat kim ta ; A vawi ruk nan Costa Rica inlan dawn

Football inkhawmpui lian ber FIFA World Cup 2022 khel tur a hriat kim, ram 32 inlan tur zingah Costa Rica chu in pettling hnunghnung ber niin, ram dang tan Qatar pan theihna tur ticket a awm tawh lo - engkim chinfel niin kawngkhar chu khar a ni ta.

Thawhlehni zan khan intercontinental playoff-ah Costa Rica hian New Zealand chu 1-0 in an hneh, goal awmchhun hi Arsenal player hlui Joel Campbell-a'n minute thumna leka a khung a ni a, goal hlutna hi pawisaa teh chhuah theih a ni lo ang.

An chak
New Zealand hi a tawpah an kim lo, substitute Kosta Barbarouses chu Francisco Calvo laka a foul avangin minute 69-naah hnawhchhuah a ni, goal an phurh bakah player tlem zawka khel chhungin an tho chhuak thei lo.

Qatar World Cup hi November 21 aṭanga khelh ṭan a ni dawn. Costa Rica hian an match hmasa ber atan 2010 champion Spain chu November 23 hian an hmachhawn dawn, group E-ah Germany leh Japan an tum leh bawk ang.

Luis Fernando Suarez-a enkawl Costa Rica tan World Cup vawi ruk an khelhna tur a ni a, tun hnaiah a zawnin vawi thum an inlanna tur a ni nghal bawk - 2014 kha an thlen san ber niin, Uruguay, Italy leh England te nen awmho mah se group stage an paltlang.

Last 16-ah Greece an hneh zui a, quarterfinal hial an inhlangkai; group stage pawh paltlang lo tura ngaih khan quarterfinal an in pet kai, an thlen san ber ṭum a la ni reng - kuminah a aia sang thlen ngei an tum dawn.

Vanneihna
World Cup khel tur hian CONCACAF qualifying-ah palina an ni a, chumi hnuah Oceania champion New Zealand an hmachhawn leh a, inkhel pawimawh bikah goal khat lekin an chak, an tan World Cup ticket neih nan chu chu a tawk.

Costa Rica coach Suarez chuan, "Goal kan khung hma hlauh kha kan vanneihpui ta a ni. A hnu lamah na takin min nawr a, a bik takin ball kangah khan an hlauhawm thei hle, a nihna takah chuan kan inveng hram hram a ni ber.

"Chawlhlawk laiin kan sawi khawm a, goal venghim turin tlarhnungah player panga kan tlar. Second half-ah kha chuan a awlsam phah ta deuh, player tam zawk kan nih chinah phei chuan inkhel kan thunun let leh zawk," tiin a sawi.

Costa Rica goalkeeper Keylor Navas chuan, "World Cup khel tur zawnna a nih avangin theihtawp kan chhuah a, kan khingpuite aiin kan khel ṭha zawk viauin ka hria," a ti. Navas hian target zawna shot vawi li a hmachhawn chu a save thei vek.