NT-a'n Dubai a thleng - inhnek hun a hnai

Mizo boxer rothap NT Lalbiakkima chuan World Trade Centre-a inhnek hmachhawn turin nimin zing dar 2:00 vel khan Dubai khawpui a thleng a, sa seh tur zawngin Zo Keite a ram chhuak leh ta.

NT-a hian World Trade Centre, Dubai-ah inhnek a hmachhawn dawn a, Philippines boxer ṭha Jayson Vayson nen WBC Asia continental title an inchuh ang.

Siaha boxer hian inhnek tura a inpeih tawh thu Vanglaini a hrilh a, NT-a chuan, "Ka inbuatsaihna pawh a ṭha thawkhat viau e," tiin a sawi.

June 18-a inhnek turah hian Mizo boxer Laldingliana a inlan dawn bawk a, Tuipui boxer hian Kazakhstan boxer Alimzhan Tursunov a hmachhawn ve dawn thung.

A rih belh!
NT-a hian minimumweight lamah fight a hmachhawn ṭhin a, professional boxing-ah chuan weight zang ber niin 47.62 kg hnuai lam inelna a ni a, Siaha boxer-in title a kawl lai IBA intercontinental title pawh hi minimumweight aṭanga a hlawhchhuah a ni.

Mahse, Dubai khawpuia fight neih tur atan NT-a hian a division a tisang a, light flyweight-ah a inlan dawn. He weight-a inlan tur chuan 47.62 - 48.98 kg inkar nih a ngai a, weight sawn hi boxing khawvelah chuan thil huaisen thlak tak pakhat a ni.

Boxer pahnih title inchuh tur hi WBC light flyweight Asia continental title a ni a, Siaha boxer hi he title fight nei tur hian a intih rih belh a, a awlsam dawn lo tih a chiang.

NT-a chuan, "Ka weight ka sawn dawn a ni a, harsa dawn mah se ka tan chuan chona phurawm tak a ni dawn a ni," a ti a, light flyweight-a inhnek ṭhang sa boxer hmachhawn dawn mah se a zam lo.

Tu nge Jayson?
Kum 24 mi Jayson hi boxing khawvelah mi thar a ni lo - vawi 11 inhnek a hmachhawn tawh a, vawi kua chakin vawi khat draw result a nei a, vawi khat chu 'no contest' ah puansak a ni.

Boxer pakua a hneh zinga panga hi a knockout a, a inhnehtawkpui hi amah ang thoa Filipino boxer Rene Mark Cuarto a ni - Cuarto hi IBF mini-flyweight title kawl mektu a ni a, Filipino boxer ropui Manny Pacquiao trainer Nonoy Neri hnuaiah a inzir ṭhin bawk.

Cuarto hi vawi 24 fight a hmachhawna vawi 20 chak thei a ni - hetiang ang boxer inhnehtawkpui thei Jayson hi a nep dawn lo tih a chiang.

No Contest-a puansak erawh Indonesian boxer Tibo Monabesa nena an inhnek chu a ni. Tibo hi Indonesian judge hlangten WBC international light flyweight title an fight-ah chak zawkah an puang a, WBC chuan an thutlukna hi a dik tawk loa ngaiin 'no contest' ah an puang zui a ni.

Zo Keite chu
NT-a'n ngawrh takin training a nei reng a, chhun lamah strength & nutritionist coach Biakzuala Khenglawt (Gtea) chuan training a neihpui a, zan lamah coach Lalmuanpuia'n (Mampuia) trainining a neihpui leh ṭhin bawk.

Mampuia chuan, "Duhthusam tlin a har a, NT-a inbuatsaihna pawh duhthusam ang chu a ni lo. Mahse, Jayson hneh turin ka ringtawk a ni," tiin Vanglaini a hrilh a, a boxer chungah rinna a nghat.

NT-a hian professional boxing a luhchilh hnuah vawi li inhnek a hmachhawn a, hnehna chang vekin a khingpuite hi a knockout vek - IBA intercontinental title a kawl mek bawk.

Chutihrual chuan Mizo boxer-in a hneh tak boxer-te hi boxer hmabak nei êng tia chhal tur an la awm rih lo a, NT-a'n fiahna tak tak a la hmachhawn lo tiin a sawi theih - June 18-ah Zo Keite rilṭam fiahin a awm dawn e!

Tuipui tlangval
Dubai khawpuia inhnekah hian NT-a chauh a inlan dawn lo - Laldingliana a inlan ve dawn a, Alimzhan Tursunov nena inhnek tur Tuipui boxer hian a phur tawh thu Vanglaini a hrilh.

A movement mawi leh huai vanga hriat hlawh Dinga hian professional fight vawi thum a hmachhawn tawhah hnehna a la chang vek a, a fight hnuhnung berah Muhammad Ammar Khan chu unanimous decision hmanga hnehin, boxer dang pahnih erawh a knockout.

Featherweight-a inlan tur Dinga chuan, "Ka huphurh lo a, ka huphurhna ai chuan ka phurna a sang zawk - hnehna chang turin inbuatsaihna pawh ka nei ṭha tawk a ni," tiin Vanglaini a hrilh - a hmachhawn tur Tursunov hian vawi nga inhnek a hmachhawnah vawi li hnehna a chang thei.

June 18, Inrinni zan dar 6:00 aṭanga en ṭan theih tur fight hi Zonet chuan mipui tana en theih turin pay-per-view kaltlangin a chhawp chhuak dawn a, television lama en duh tan Zonet distributor hnenah Rs.100 pein a en theih ang a, online-a en duh tan Zonet Empai subscribe tute tan a en theih dawn bawk - Empai hi Rs. 199 aṭanga inṭanin a subscribe theih.

NT-a'n nimin khan Dubai-ah training a neih chhunzawm nghal a, boxing khawvela trainer lar Anthony 'Chill' Wilson nen training an nei - Anthony 'Chill' Wilson hi British boxer ropui Anthony Joshua te pawh lo train tawhtu a ni a, world champion boxer 21 zet a lo chher chhuak tawh.