Asian Cup khel tur India

India chuan Thawhlehni zan khan 4-0 ngawtin Hong Kong an sawp a, Asian Cup 2023 khel turin an tling chiang hle - Blue Tigers tan hian Anwar Ali, Sunil Chhetri, Manvir Singh leh Ishan Pandita te chuan goal khat ṭheuh an khung.

Kolkata khawpuia team pahnih an intawn hma hian India leh Hong Kong hi Asian Cup khel turin an tling hman - hei hi a chhan ber chu Palestine-in 4-0 a Philippines an sawp vang a ni.

Philippines hian group B-ah pahnihna ni chungin qualifier an khar a, mahse, point li chiah an hmu - hei vang hian point ruk nei sa India leh Hong Kong hi pahnihna ti ṭha zual pangaah an tel chiang a, match tawp ber an khelh hmain an tling.

Blue Tigers hian an result hre sa mah se an inthlahdah phah lo a, minute hnihna lekah lung ṭhat loh vanga inkhel thei tawh lo tura tih ni hman Anwar Ali chuan India tana a goal hmasa ber a khung a, Chhetri-a'n minute 45-naah mawi zetin a chhunzawm.

Kum 37 mi Chhetri hian ram tan match 129 a khelhah goal 84 a khung a, international football-a goal khung tam lamah pangana niin, Hungary legend Ferenc Puskás chu ram tana goal khung tam lamah a nihrual.

India hian goal hnihah duhtawk mai loin, Manvir chuan minute 85-naah a belhchhah a, Ishan Pandita chuan hun pek belhah ram tana a goal hmasa ber a khung ve bawk.

AFC Asian Cup qualification third round aṭang hian Jordan, Indonesia, Palestine, Uzbekistan, Thailand, India, Hong Kong, Bahrain, Malaysia, Tajikistan leh Kyrgyzstan te chu Asian Cup 2023 khel turin an tling a, anni hma hian Syria, China, Australia, Iran, Iraq, Saudi Arabia, Qatar, Oman, Japan, United Arab Emirates, Vietnam, South Korea leh Lebanon te chu an lo tling tawh.