Liverpool fan-te u, in tan chanchin lawmawm kan rawn thlen e!

Premier League club Liverpool chuan Thawhlehni zan khan an club ṭantute tana thu hriat nuam em em an puang a, chu chu Benfica striker Darwin Nunez an lakluh thu a ni.

Benfica-in Nunez an hralh tur thu an puan hnuah Reds-in Uruguayan striker an lakluh thu an puang lawk lo a, Merseyside club ṭantuten thin phu dep depin Nunez chanchin an ngaichang.

Liverpool ṭantute tan thlamuang taka awm a hun ta e - Nunez chuan a hming chuanna Liverpool jersey a pawt pharh ta a, season tharah Reds jersey nen Nunez kan hmu dawn.

Kum 22 mi striker manah hian Liverpool chuan pound maktaduai 64 an pe phawt dawn a, mimal chet ṭhat dan leh club khelh ṭhat dan a zirin a man hi £85mtd thlenga sang chho thei tur a ni - kum ruk chhung atan contract a ziak.

Nomawi chawi turin...
Liverpool-in Nunez-a manah sum an seng huai a, £64mtd baka an la pek leh tur, £21mtd hi Nunez-a ṭawngkam aṭang chuan an pek belh leh ngei a ngai dawn niin a lang - a khelh regular hrim hrimin a man hi £75mtd velah a sang chho dawn a, nomawi chawi dan a zirin £85mtd a ni chho ang.

Nunez chuan, "Liverpool hi club ropui tak a ni a, he club ka zawm thei hi ka hlim hle - nomawi tam tak chawi ka duh a ni," a ti a, Uruguayan striker chuan sawi zawmin, "Liverpool training ground ka rawn thlen rualin, club kalphung leh nihphung khan min barakhaih takzet a, nomawi pawh a tam hle," a ti.

Uruguay tana vawi 11 inlana goal hnih khungtu striker chuan, "Reds sulhnu thlir chuan nomawi tam zawk chawi belh chiah mitthlaah a awm a, nakinah he nomawi hunna hmunah hian kalin, ka tel vena nomawite chu thlir ka duh dawn a ni.

"Chu chu Liverpool-a ka rawn kal chhan ber a ni a, he hmunah hian nomawi chawi turin ka lo kal a nih hi," a ti - Liverpool hi season hman zawh takah khan FA Cup leh League Cup-ah an champion a, Champions League leh Premier League-ah pahnihna an ni thung.

Beiseina
Nunez hian an ram club Penarol-ah a career ṭanin August 2019 khan Almería a zawm a, Spanish second division club-ah hian kum nga chhung khel turin contract a ziak.

Mahse, Segunda lamah hun a hmang rei lo. Benfica chuan an club-a khel turin Nunez an hmin a, an club chanchina player man to ber ni turin September 2020 khan Benfica chuan £20mtd in an lei.

Benfica-a a season hmasa berah hian Covid-19 leh hliam vangin a buai a, season khat chhungin goal ruk chiah a khung. Mahse, season hman zawh takah Nunez a inlar ta a, amah duhtu an pung hluai!

Nunez hi Manchester United, Chelsea leh Paris Saint-Germain ten an rim vek a, January transfer-ah khan West Ham leh Newcastle United ten an dawr bawk - a tawpah erawh a duh ber Liverpool a pan ta.

Sulhnu ropui
Liverpool striker hlui, Uruguay-a Nunez khelhpui Luis Suarez chuan Barcelona chu ram tana a khelhpui player hi en thli thlai turin a lo rawn daih tawh a, mahse, Catalan club-in an ngaihven tawk lo.

Suarez chuan, "Kum 15 chhung international experience ka nei tawh a, forward tana pawimawh tlem a zawng chu ka hre ve. Nunez hi en thla rawh u," tiin Barca a hrilh.

Mahse, Catalan club-in Nunez an lalut ta lo a, Liverpool lawmah a lo tla. Uruguayan striker hian season hman zawh takah khan inelna hrang hrangah match 41 khelin goal 34 a khung a, league bikah match 28 khelin goal 26 a khung - vawi 24 bul a ṭan a, a goal khung zinga goal 25 chu a bul ṭan ṭuma a khungte an ni.

Liverpool nena inrem
Nunez hian season hmasa khan Champions League match 10-ah goal ruk a khung a, goal hnih chu quarterfinal-a Liverpool nen an inhmachhawn ṭuma a khung a ni - Reds defender-ten a ṭhatzia an hrechiang.

Liverpool boss Jurgen Klopp chuan, "Footballer ṭha tak, hmasawn zel tura theihna nei sang tak a ni a, a kum zat, a phurna leh hmasawn zel duh mi a nihna piahlamah, kan club hmachhawpa beiseina sang tak a neite hian min tiphur lehzual a ni," a ti.

Klopp chuan sawi zawmin, "Nunez hian a khelh dan leh kan kalphung hi a inmil thlapah a ngai a, keinin kan player tur tak niin kan hre bawk - in che ho tak tak ang hmiang," a ti a, a phur hle.

Liverpool hian Nunez an lakluh takah chuan Sadio Mane an chelh luih a rinawm lo a, Bayern Munich-in an beisei mek forward hi £42mtd aia tlawma hralh erawh an tum lo niin an sawi.

Hlauh nei lo
Klopp chuan, "Nunez hi inkhel kalphung thlak danglam thei, player thatho tak a ni a, khelmual lai leh sirah a khel kawp thei a, a che vel pawh a hriam ṭhain a hmuhnawm ṭhin hle," a ti a, a player thar a fak hle.

Benfica-a a khelh dan thlirin, Nunez hi tlarhmaah a khelh dan thlak a ni fo. Portuguese club-in formation-a 3-4-3 emaw 3-4-2-1 emaw an hman chuan mual vei lam sirah a awm tlangpui a, tlarhmaa maltlat chang leh striker hnung chiaha awm chang pawh a nei.

Klopp chuan, "Hlauhna tel loa khel ṭhin, player chak tak a ni a, kan fan-ten hmuh nuam an ti khawp ang," a ti a, chutihrual chuan German coach hi a ṭawng fimkhur ve tho. Klopp chuan, "Darwin hi player hmasawn mek a ni tih kan hriat a ṭul a, ani pawhin chu chu a hria.

"Football-a a rilru a pek dan leh a inngaihtlawmna hi ka duh chi tak a ni. Tlarhmaah player duhawm tak tak kan nei sa a, kan zingah a rawn tel ve leh ta. Darwin tan pressure engmah a awm lo - rei tak cham turin contract a ziak a, a theihnate lo tihpunsak kan tum dawn a ni," tiin a sawi.