Inter Village Football khel turin team 204-in hming an pe
Mizoram Football Association buatsaih LBS Suzuki All Mizoram Inter Village Football Tournament khel turin team 204-in hming an pe a, Mizoram chhung veng/khua inelnaa team tel tam ber dawttu a ni.
Team 204!
Mizorama football inelna sang ber Mizoram Premier League-ah team pariat an awm a, player 160 chuang an inziak lut. MFA hnuaiah distirct hrang hrang a awm a, a lian ber Aizawl DFA hnuaiah hian zone tel loin division pathum a awm. Heng division pathuma club awm zat chu 34 a ni.
Chumi awmzia chu MFA leh Aizawl DFA hnuaiah club 42 a awm a, hemi let nga dawn hian All Mizoram Inter Village Football Tournament hi an khel dawn - a nep thei tawh lo.
An tam ṭhin
Veng/khua inelna changtlung taka buatsaih ṭhin chu Central YMA an ni a, CYMA Football hi kum 1985 aṭanga khelh ṭan kha niin inelna neih hnuhnun ber kum 2019 thleng khan ṭum 20 neih a ni tawh.
CYMA football-a team tel tam ber ṭum chu kum 2015 kha niin team 191 an tel a, Armed Vengin Lengpui hnehin an champion. Inter Branch YMA football tournament-ah hian team 100 chuangin an khel fo a, mahse team 200 an la tling ngai lo.
Chutihrualin team 200 chuang telna Mizoramah a awm tawh a, chu chu Red Ribbon 2010 kha niin team 212 tehmeuh an inziaklut. Electric Vengin Dinthar hnehin an champion a, sial leh nuai khat an dawng.
An tam leh ta
Covid-19 vangin Mizoram Football Association-in football inelna a buatsaih thei lo a, tunah erawh hri lengin ziaawm lam a pan leh tak avangin inelna lian tham All Mizoram Inter Village Football Tournament a buatsaih leh ta.
Inelna hi Mizoram Premier League awm tura club-te tana player zawnna hmun a ni dawn a, phai lam aṭangin scout an rawn kal dawn bawk. Hemi a nih avang hian khawtlang an ṭang a, Mizoram kil tin aṭangin team an rawn inlar.
Lawmman pawh a chhe dawn lo. Champion team-in Rs 1,50,000 an hum haw dawn a, pahnihna lawmman pawh Rs 1,00,000 a la ni. Best player thlan a nih dawn bakah position tina che ṭha lawmman a awm.
MFA-in inelna tel châkawm tak a buatsaih a, football ngainatute tuihal lai tak a ni bawk nen. Inter Village Football khel turin team 212 tehmeuhin hming an pe a, June 24 aṭangin tualchhung football thlir tur a awm dawn e.