Mizo club tan Mizo tlangval Danmawia
Aizawl FC-in I League ṭan hmain Chanmari West FC aṭangin R. Laldanmawia an lalut a, Sialhawk tlangval chungchanga tualchhung football ngainatute ngaihdan a inang lo. I League-a tawn hriat nei lo Danmawia hi AFC-in an ṭhatpui aia an ṭhatpui phah loh ringtu an tam zawk hial awm e - Sialhawk tlangvalin goal pawimawh pahnih hmangin chhânna a rawn siam a, inhnial zuina tur a awm tawh lo!
Mizoram pûm chhuak
Kum 2011 khan AIFF Sub Junior Mir Iqbal Trophy-ah Mizoram chu Barasat Stadium, Kolkata-ah an champion a, R. Laldanmawia a captain bakah goal a khung tam ber bawk. Sialhawk tlangval hian Red Ribbon Football-ah Durtlang tan a khel zui a, final-ah Dinthar hnehin an champion.
Mipui nawlpuiin Red Ribbon Football 2011-ah Danmawia hi an hmelhriat a; amaherawhchu a bul ṭanna a ni lo.
Thingtlang rawlthar lo hmu fuhtu, 1st Bn MAP Football Academy-a Danmawia chhertu coach Lalramhluna chuan, "CYMA Football 2010-ah khan Danmawia hi Sialhawk tana a khel ka hmu a, kan academy-a lut turin ka sawm nghal. Khatih hunlai pawh khan player thuawih tak a ni a, player ṭha a ni tih pawh ka hria a, amaherawhchu a len loh avangin tun ang a thlen phak hi ka ring lo," tiin Vanglaini palai a hrilh.
Nomawi chawi thei 'bik' chu
Danmawia hian 1st Bn MAP Academy hi I Day Football 2010-ah a champion pui a, tun ṭuma Santosh Trophy-a Mizoram captain Lalrinchhana nen academy khat chhuak an ni.
Sialhawk tlangval hi kum thum chhung 1st MAP Academy-ah hian a awm a, kum 2012 khan Mizoram team chu Sikkim-a neih Dr TAo Football-ah a champion pui a, Mizoram manager T. Vanlalhluna chuan Dinthar FC-ah a sawm lut nghal.
MPL hmasa berah Danmawia'n Dinthar FC champion pui nghalin best player-a thlan a ni a, I Day Football 2014-ah Aizawl tlak lam club hi a champion pui bawk.
Danmawia hian National Sub Junior Championship-a an champion ṭuma an coach HC Zarzoliana hnung zuiin Dinthar FC a pan a, chutah Zara hnuaiah vek hian Chanmari FC leh Chanmari West FC-ah season khat ve ve a khel tawh. MPL season nga a khelh chhungin goal 30 zet a thun.
Red Ribbon Football 2012-ah Chanmari a champion pui a, NECS Cup 2013-ah Ramhlun South a champion pui bawk.
Danmawia chanchina hriat reng tlak chu 2014 Santosh Trophy Qualifier-a Manipur lama a goal khung kha a ni a, he goal vang hian Mizoramin final round an lut a, a vawi khat nan an champion zui bawk.Kum 2014 hian Mizoram hi Dr TAo Football-ah an champion bawk.
I League lamah
MPL5-ah Danmawia aiin Laldampuia a langsar zawk a, Aizawl FC sawm chhuah zawk erawh Sialhawk tlangval a ni.
Khalid Jamil-a'n a hmelhriat loh Danmawia khelhna hun a pe tam nghal lo a, match hmasa 10-ah vawi khatmah inkhel bul a ṭan lo. East Bengal an hmachhawn hmasak ṭumin bench-ah a ṭhu tluan a, Churchill Brothers leh Mohun Bagan nen squad-ah dah a ni lo.
Season chawhnuah East Bengal-in RG Stadium an tlawh a, Danmawia hian a vawi khat nan inkhel bul ṭanin goal awm chhun a khung a, Mizo club-in Red and Gold an vawi khat hnehna a ni. Hemi hnu hian Khalid-a hnuaiah Danmawia'n hmun pawimawh changin Chennai City, Mumbai FC leh DSK nen inkhel bul a ṭan vek.
Aizawl FC tana Danmawia'n inkhel bul a ṭan ṭumin Mizo club an chak vek.
Mizo an pawimawh
Aizawl FC-in khelh zat inangah a vawi khat nan I League-ah hma an hruai a, Mizo club tan foreigner pali leh state pawn player pathum an pawimawh tih phat rual a ni lo. Chutihrualin Mizo club-in tun dinhmun an thlen theih chhan chu tualchhung player an neih ṭhat vang a ni.
Khalid Jamil-a hnuaiah Zohmingliana Ralte, Lalruatthara, Lalrinzuala Khiangte, Lalramchullova, V Lalṭanpuia, Brandon VL Remdika, leh H. Lalmuankima ten hun pawimawhah an theihna an lantir a, I league chung berah Mizo club an awm mek.
I League - Khelh Hmabak
East Bengal
Mar 12 Chennai City FC (A)
Apr 9 Mohun Bagan (A)
Apr 16 DSK Shivajians (H)
- Mumbai FC (A)
- Minerva Punjab (H)
Aizawl FC
Mar 11 Minerva Punjab (A)
Apr 9 Bengaluru FC (A)
Apr 15 Churchill Brothers (A)
- Mohun Bagan (H)
- Shillong Lajong (A)
Mohun Bagan
Mar 11 Bengaluru FC (A)
Apr 1 Bengaluru FC (H)
Apr 9 East Bengal (H)
Apr 12 Shillong Lajong (A)
Apr 15 Minerva Punjab (A)
- Aizawl FC (A)
- Chennai City (H)
Team Dinhmun
# Team Pld W D L GF GA GD Pts
1 Aizawl FC 13 9 2 2 17 9 8 29
2 East Bengal 13 8 3 2 24 9 15 27
3 Mohun Bagan 11 6 4 1 18 8 10 22
4 Shillong Lajong 12 6 1 5 18 16 2 19
5 Bengaluru FC 11 4 4 3 16 11 5 16
6 Churchill Brothers 13 4 3 6 17 19 -2 15
7 DSK Shivajians 13 2 5 6 10 16 -6 11
8 Minerva Punjab 13 2 5 6 10 21 -11 11
9 Mumbai FC 13 2 4 7 8 18 -10 10
10 Chennai City 12 2 3 7 8 19 -11 9